1 րոպեի ընթերցում
ԵՐԵՎԱՆ, 31 ՀՈւՆՎԱՐԻ, ԱՐՄԵՆՊՐԵՍ: Միջսիրիական բանակցությունների երկրորդ փուլը կմեկնարկի փետրվարի 10-ին: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, այս մասին հունվարի 31-ին մամուլի ասուլիսին հայտարարել է Սիրիայի հարցով ՄԱԿ-իև ԱԵԼ-ի հատուկ բանագնաց Ախդար Իբրահիմին: Նա նշել է, որ Սիրիայի ընդդիմությունը համաձայնել է ամսաթվի հետ, իսկ կառավարական պատվիրակությունն այն ցանկանում է քննարկել Դամասկոսի հետ:
Իբրահիմին ավելացրել է, որ բանակցությունները շատ դանդաղ են առաջ ընթանում: Նրա խոսքով` կողմերը համաձայնության են եկել մի քանի հարցերի շուրջ` Սիրիայում կրակի դադարեցման, դրանով իսկ սիրիացիների տառապանքներին վերջ դնելու: Բացի այդ, կողմերը կոչ են արել ամբողջովին կատարել ժնևյան համաձայնագրի բոլոր կետերը:
Շվեյցարիայում հունվարի 22-ին մեկնարկել էր Ժնև-2 միջազգային համաժողովը, որին հետևել էին Սիրիայի կառավարության և ընդդիմության ուղիղ բանակցությունները` ՄԱԿ-ի և ԱԵԼ-ի հատուկ բանագնաց Ախդար Իբրահինիի միջնորդությամբ: Ընդհանուր առմամբ, բանակցությունների առաջին փուլում մեծ առաջընթաց և հաջողություններ չեն գրանցվել: Ախդար Իբրահիմին հույս ունի, որ բանակցությունների երկրորդ փուլը կլինի կառուցողական: