Նոր Խարբերդում անհայտ անձը հրազենից արձակած կրակոցով 49-ամյա տղամարդու է սպանել
1 րոպեի ընթերցում
![Նոր Խարբերդում անհայտ անձը հրազենից արձակած կրակոցով 49-ամյա տղամարդու է սպանել](http://armenpress.am/resized/480/static/news/b/2014/01/747975.jpg)
ԵՐԵՎԱՆ, 29 ՀՈՒՆՎԱՐԻ, ԱՐՄԵՆՊՐԵՍ: ՀՀ ոստիկանության Մասիսի բաժնում հունվարի 29-ին` ժամը 13.20-ին, հիվանդանոցից հաղորդում է ստացվել, որ մարմնական վնասվածքներով բուժօգնության է տեղափոխվել 1965թ. ծնված Գրիգոր Խաչատրյանը: Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի եւ լրատվության վարչությունից, մեկնած օպերատիվ խումբը պարզել է, որ նույն օրը` ժամը 13.00-ի սահմաններում, Նոր Խարբերդ գյուղում գտնվող մի հարսանյաց սրահում անհայտ անձը հրազենով 3 անգամ կրակ է արձակել Գրիգոր Խաչատրյանի վրա:Գրիգոր Խաչատրյանը տեղափոխվել է հիվանդանոց, որտեղ նույն օրը` ժամը 13.40-ի սահմաններում, մահացել է:
Ձեռնարկվում են միջոցառումներ անհայտ անձին հայտնաբերելու ուղղությամբ:Ոստիկանության Արարատի մարզի քննչական բաժնում ՀՀ քրեական օրենսգրքի 104 հոդվածի 1-ին մասի և 235 հոդվածի 1-ին մասի հատկանիշներով հարուցվել է քրեական գործ:Կատարվում է նախաքննություն: