ՍԴ-ն «Կուտակային կենսաթոշակների մասին» օրենքի սահմանադրականության դիմումը կքննարկի մարտի 28-ին

ԵՐԵՎԱՆ, 26 ԴԵԿՏԵՄԲԵՐԻ ԱՐՄԵՆՊՐԵՍ: Սահմանադրական դատարանն Ազգային ժողովի չորս խմբակցությունների ներկայացրած «Կուտակային կենսաթոշակների մասին» ՀՀ օրենքի որոշ դրույթների սահմանադրականության վերաբերյալ դիմումը կքննարկի 2014թ. մարտի 28-ին` ժամը 10-ին: Այս մասին «Արմենպրես»-ին տեղեկացրին ՀՀ Սահմանադրական դատարանից: Դիմումի ապահովման վերաբերյալ դիմող կողմի միջնորդությունը կքննարկվի մինչեւ 2014 թվականի հունվարի 25-ը: Գործով զեկուցողներ են նշանակվել ՀՀ Սահմանադրական դատարանի դատավորներ Վոլոդյա Հովհաննիսյանն ու Կիմ Բալայանը: Գործով որպես պատսխանող կողմ կներգրավվի ՀՀ Ազգային ժողովը: Սահմանադրական դատարանը անհրաժեշտ է համարել դատաքննության հրավիրել նաեւ Կառավարության եւ Կենտրոնական բանկի ներկայացուցիչներին` իրենց իրավասությունների շրջանակներում անհրաժեշտ պարզաբանումներ տալու համար:

ՀՀ ԱԺ չորս խմբակցություններ` ՀՅԴ, ԲՀԿ, «Ժառանգություն» եւ ՀԱԿ, դեկտեմբերի 16-ին դիմել էին Սահմանադրական դատարան` վիճարկելու «Կուտակային կենսաթոշակների մասին» ՀՀ օրենքի մի շարք դրույթների սահմանադրականությունը: Օրենքի պարտադիր կուտակային բաղադրիչը ուժի մեջ կմտնի հունվարի 1-ից, այդ իսկ պատճառով խմբակցությունները ՍԴ միջնորդություն են ներկայացրել մինչ դատարանի վճռի հրապարակումը կասեցնել օրենքի կիրառումը: