Դամասկոսում պայթյուններ են տեղի ունեցել

ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Դամասկոսում նոյեմբերի 26-ին պայթյուն է տեղի ունեցել, որի հետևանքով, նախնական տեղեկություններով, 15 մարդ զոհվել է, ևս 35-ը՝ վիրավորվել: Ինչպես հաղորդում է «Արմենպրես»-ը, վկայակոչելով սիրիական լրատվամիջոցները, պայթյունը տեղի է ունեցել Սոմարիա ավտոկայանի մոտ, որտեղից ուղևորները մեկնում են Բեյրութ: Նմանատիպ պայթյուն տեղի էր ունեցել նաև նախորդ ամսվա ընթացքում:

Բացի այդ, հրասանդ է ընկել է Դամասկոսի Բաղդադ փողոցում, ինչի հետևանքով 3 մարդ զոհվել է, 21-ը՝ վիրավորվել: Սիրիական ՍԱՆԱ գործակալությունը տեղեկացրել է, որ հրասանդն ընկել է բնակելի շինություններից մեկի վրա: Բացի այդ, երկու հրասանդներ ընկել են Բրզե թաղամասի բնակելի տների վրա, որոնց հետևանքով 17 մարդ վիրավորվել է:

Լրատվամիջոցները նաև տեղեկացրել են, որ զինյալները սկսել են նահանջել Դամասկոսի Յարմուք ճամբարից, որտեղ պաղեստինցի փախստականներ են բնակվում: Սիրիական բանակը սկսել է ռմբակոծել Դամասկոսի Կալամուն շրջանի գյուղերը: Արդյունքում` զինյալները լուրջ կորուստներ են կրել:

ՄԱԿ-ի տվյալներով` Սիրիայում 2.5 տարվա ընթացքում զոհերի թիվը գերազանցել է 120 հազարը: Այդ թվում` մինչև 2013թ.-ի նոյեմբերի 14-ը զոհվել է 65 հայ: Զոհերից 46-ը գրանցվել է Հալեպում, 16-ը՝ Դամասկոսում, 2-ը՝ Ղամիշլիում և 1-ը՝ Լաթաքիայում: