Սիրիայի ազատ բանակը հսկողություն է հաստատել Հալեպի մերձակայքի 11 գյուղերի վրա

ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Սիրիայի ազատ բանակը երկու օրվա ընթացքում հսկողություն է հաստատել Հալեպի մոտակայքում գտնվող 11 գյուղերի վրա: Ինչպես հաղորդում է «Արմենպրես»-ը` վկայակոչելով արաբական լրատվամիջոցները, միևնույն ժամանակ բախումները շարունակվում են Դամասկոսում և շրջակա գյուղերում: «Ալ Ջազիրա»-ն տեղեկացնում է կառավարական ուժերի և Սիրիայի ազատ բանակի կողմից տասնյակ զոհերի մասին: Տեղեկություններ կան նաև այն մասին, որ Հալեպի մոտակայքում տեղի ունեցած բախումների ժամանակ կառավարական ուժերի 60 զինվոր է զոհվել:

Սիրիայի ազատ բանակը հսկողություն է հաստատել Սաֆիրա գյուղում գտնվող գործարանի վրա, որը համարվում էր կառավարական ուժերին զենք և զինամթերք մատակարարող ամենամեծ կենտրոնը հյուսիսային շրջանում:

Արաբական մեկ այլ աղբյուր տեղեկացնում է, որ սեպտեմբերի 23-ի առավոտյան վերսկսվել են բախումները Դամասկոսի Բրզե թաղամասում:

Սիրիական ՍԱՆԱ գործակալության փոխանցմամբ` կառավարական ուժերը կանխել են զինված խմբավորման մուտքը Հալեպ: Տեղի ունեցած բախումների ժամանակ մեծ թվով զինյալներ են սպանվել: Բացի այդ, Բանի Զեյդ, Բուսթան ալ Կասր, աս Սուքքարի և Բաբ ալ Հադիդ թաղամասերում տեղի ունեցած բախումների ժամանակ զինյալները լուրջ կորուստներ են կրել: Հալեպի բանտի շրջակայքում կառավարական ուժերը զինյալներին պատկանող զենքեր են ոչնչացրել:

2011թ.-ի մարտի 15-ից ի վեր, ՄԱԿ-ի տվյալներով, Սիրիայում շարունակվող բախումների հետևանքով զոհերի թիվը գերազանցում է հարյուր հազարը, այդ թվում` զոհված հայերի թիվը գերազանցում է մի քանի տասնյակը: