ՄԻՊ Կարեն Անդրեասյանը հարցադրումներ է ուղարկել ՀՀ ոստիկանության պետ Վլադիմիր Գասպարյանին

ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: Մարդու իրավունքների պաշտպան Կարեն Անդրեսյանը գրություն է ուղարկել ՀՀ ոստիկանության պետ Վլադիմիր Գասպարյանին` 2013 թվականի օգոստոսի 24-ին տեղի ունեցած իրադարձությունների կապակցությամբ: Ինչպես «Արմենպրես»-ին հաղորդեցին ՄԻՊ գրասենյակից, ՀՀ մարդու իրավունքների պաշտպանին հասցեագրված դիմում-բողոքների պատշաճ ընթացքն ապահովելու նպատակով անհրաժեշտ է ստանալ ոստիականապետի պարզաբանումները ներկայացվող հարցադրումների վերաբերյալ: Ըստ գրության` «Զանգվածային լրատվության միջոցներում լայնորեն տարածված տեսագրությանուսումնասիրության արդյունքում առերևույթ իրավաչափության խնդիր է առաջանում ՀՀ Ոստիկանության առանձին ծառայողների` մի շարք քաղաքացիների նկատմամբ իրականացված գործողությունների վերաբերյալ, մասնավորապես.

Իրավաչափ և անհրաժե՞շտ էր արդյոք Արգիշտի Կիվիրյանի նկատմամբ մեկից ավելի դրվագներում ոստիկանությանմիաժամանակ մի քանի ծառայողների կողմից կիրառված ուժը և հասցված մարմնական վնասվածքները, հատկապես այն դրվագներում, երբ վերջինիս կողմից դիմադրությունը բացակայում էր. օրինակ` Ա. Կիվիրյանին գետնին տապալելը և/կամ հարվածելը;

Իրավաչա՞փ էր արդյոք ակցիային մասնակցող` վնասազերծված և այլ իրավախախտում չկատարող անձանց նկատմամբ կիրառված ֆիզիկական ուժը և անհարկի ագրեսիվ վերաբերմունքը, հատկապես` նշված անձանց ոստիկանության ծառայողական մեքենա նստեցնելիս;

Ինչո՞վ է պայմանավորված ոստիկանության առանձին ծառայողների կողմից անհարկի ֆիզիկական ուժի օգտագործումը այն քաղաքացիների նկատմամբ, որոնք տվյալ դրվագում չէին խախտում հասարակական կարգը (Տե'ս տեսագրություն` 15:12 - 15:50);

Արդյո՞ք պարզաբանվել են ակցիային մասնակցող անձանց իրավունքները` վերջիններիս ազատությունը սահմանափակելու պահից (վճռաբեկ դատարանի ԵԱԴԴ 0085/06/09 բերվածի կարգավիճակի առանձնահատկությունները հաշվի առնելով (նախնական և կարճաժամկետ բնույթը)` բերվածը պետք է օժտված լինի առնվազն հետևյալ իրավունքներով. ա) իմանալու իրեն արգելանքի վերցնելու պատճառը (բ) տեղեկացնելու իրեն բերման ենթարկելու մասին, (գ) հրավիրելու իր փաստաբանին, (դ) լռելու: Օրինակ` ոստիկանության ծառայողական մեքենա նստեցնելը;

Ինչո՞վ է պայմանավորված ոստիկանության ծառայողական մեքենան վարելը այն պարագայում, երբ ակցիայի մասնակիցները մեքենայի առջևում էին և փողոցը մարդաշատ էր;

Ինչո՞վ է պայմանավորված Ոստիկանության ծառայողի կողմից շինարարություն իրականացնելու թույլտվության օրինականության վերաբերյալ դիրքորոշում հայտնելը` հաշվի առնելով ոստիկանության ծառայության անկողմնակալության սկզբունքը (Տե'ս տեսագրություն` 33:09 - 33:39);

Ինչո՞վ է պայմանավորված Ոստիկանության մի շարք ծառայողների կողմից քաղաքացիների հետ հաղորդակցման ընթացքում պրոֆեսիոնալիզմի և էթիկայի կանոնների թույլ տրված խախտումները, մասնավորապես` անհարգալից, վիրավորական արտահայտություններ օգտագործելը:

Ելնելով վերոգրյալից, հաշվի առնելով դիմումատուների շահերը, ինչպես նաև ղեկավարվելով «Մարդու իրավունքների պաշտպանի մասին» ՀՀ օրենքի 12-րդ հոդվածով` խնդրում եմ 5-օրյա ժամկետում ներկայացնել Ձեր պարզաբանումները վերոնշյալ հարցադրումների վերաբերյալ, մասնավորապես` հստակեցնելով դրանց իրավաչափությունը, հետապանդվող նպատակը և թե ինչ միջոցներ են ձեռնարկվել և/կամ ձեռնարվելուՈստիկանության օրինախախտ ծառայողներին պատասխանատվության ենթարկելու ուղղությամբ»,-ասված է Կարեն ԱնդրեասյանիՎլադիմիր Գասպարյանին ուղղված գրության մեջ:

Օգոստոսի 24-ին Կոմիտասի 5 հասցեում բազմաբնակարան շենքի կառուցման դեմ բողոքի ակցիայի ժամանակ բախում է տեղի ունեցել ակցիայի մասնակիցների և ոստիկանության ներկայացուցիչների միջև, որի արդյունքում շուրջ 30 անձ վարչական բերման է ենթարկվել: