Տիգրան Մանսուրյանին նվիրված հեղինակային երեկո կանցկացվի մեծանուն կոմպոզիտորի մասնակցությամբ

ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: Հայ մեծանուն կոմպոզիտոր Տիգրան Մանսուրյանին նվիրված հեղինակային երեկո կանցկացվի «Մեցցո» երաժշտական ակումբում մայիսի 7-ին: Ինչպեսմայիսի 6-ին լրագրողների հետ հանդիպման ժամանակ նշեց Տիգրան Մանսուրյանը, երեկոյի ընթացքում կներկայացվեն ինչպես իր հեղինակած ստեղծագործությունները, այնպես էլ կլինի մտերմիկ զրույց հանդիսատեսի հետ: «Կլինի շփում երաժիշտ ընկերների եւ հանդիսատեսի միջեւ: Նրանց կպատմեմ իմ ստեղծագործությունների գրման պատմության մասին, ինչպես նաեւ այն մղող ուժի, որն օգնում է ինձ»,-«Արմենպրես»-ի փոխանցմամբ` ասաց Տիգրան Մանսուրյանը` հավելելով, որ կլինի մի երեկո, որի արդյունքում կգոյանա համատեղ խմբանկար:

Երեկոյին կմասնակցեն Տիգրան Մանսուրյանը (դաշնամուր), Իրինա Զաքյանը (սոպրանո), Յանա Դարյանը (ալտ) եւ Նելլի Մանուկյանը (ֆլեյտա): Կնվագակցեն նաեւ Ջուլիետա Վարդանյանը (դաշնամուր), Արամ Թալալյանը (թավջութակ):Համերգային ծրագրում ընդգրկվել են նաեւ «4 երգեր», «Madrigal թիվ 3»-ը, «2 մաս լարային քառյակի համար», «Allegro Barbaro»-ն եւ «4 հայրեններ» ստեղծագործությունները:Ծրագրվում է ներկայացնել նաեւ կհնչի տարբեր ֆիլմերի համար Տիգրան Մանսուրյանի հեղինակած երաժշտությունը: «Կինոյի աշխարհը չափազանց գրավիչ է: Եթե ժամանակին դուրս գալու քաջություն չունեցար, կտանի քեզ»,- ասաց նա: Կոմպոզիտորը նաեւ շեշտեց` իր կյանքն առանց երաժշտության անիմաստ է համարում:

Տիգրան Մանսուրյանը հեղինակ է գլխավորապես նվագախմբային, կամերային, երգչախմբային եւ վոկալ գործերի, որոնք կատարվել են ամբողջ աշխարհում։Կոմպոզիտորի ստեղծագործությունները մեծ հաջողությամբ են ընդունվում Լոնդոնում, Փարիզում, Հռոմում, Միլանում, Վիեննայում, Մոսկվայում, Վարշավայում, Նյու Յորքում, Լոս Անջելեսում եւ համաշխարհային երաժշտական այլ մայրաքաղաքներում։ Մանսուրյանի ստեղծագործությունները հայկական երաժշտարվեստի եւ ժողովրդական ավանդույթների հետաքրքիր միահյուսություն են իրենց լուսապայծառ, արտահայտիչ մեղեդիներով, բարձրաճաշակ ու ընտիր հնչերանգներով։