1 րոպեի ընթերցում
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Հայաստանի ֆուտբոլի գործող գավաթակիր Գյումրու «Շիրակ»-ի երկրորդ մրցաշրջանի գլխավոր նպատակը գավաթը պահպանելն ու Հայաստանի չեմպիոն դառնալն է: Այս մասին«Արմենպրես»-ի հետ զրույցում ասաց թիմի գլխավոր մարզիչ Վարդան Բիչախչյանը: Նա նշեց, որ Անթալիայում անցկացրած ուսումնամարզական հավաքի հիմնական ուշադրությունը դարձրել են ստուգողական խաղերի վրա:
«Ընկերական խաղերը մեզ հնարավորություն տվեցին հասկանալու, թե ինչպես կմեկնարկենք առաջնությունը եւ գավաթի խաղարկությունը: Ամեն ինչ անելու ենք մեզ ընձեռված այս հնարավորությունից օգտվելու համար»,- ասաց Բիչախչյանը:
Հայաստանի ֆուտբոլի գավաթի խաղարկությունը մեկնարկում է մարտի 3-ին: Գավաթի քառորդ եզրափակչի առաջին հանդիպումը «Շիրակ»-ը կանցկացնի Երևանի «Արարատ»-ի հետ: