ՊԵԿ «Ուսումնական կենտրոն» ՊՈԱԿ-ի դասընթացներում առանցքային դեր ունեն նաև բնապահպանական գիտելիքներն ու ծրագրերը

Կենսաբազմազանության պահպանմանն ուղղված միջազգային բոլոր պարտավորությունները, ինչպես նաև վավերացված կոնվենցիաները գործնականում իրագործելի են միայն այն դեպքում, երբ այդ նպատակներն իրականացնող մասնագետներն ունեն բավարար գիտելիքներ ու կարողություններ։

«Արմենպրես»-ի հետ զրույցում ՊԵԿ «Ուսումնական կենտրոն» ՊՈԱԿ-ի հետազոտությունների և նորարարության բաժնի պետ Անի Ջաբաղյանն ու նույն կառույցի համագործակցության և զարգացման բաժնի պետ Սյուզաննա Ղազարյանն անդրադարձել են ՊԵԿ կրթական հաստատության գործունեությանը՝ նշելով, թե այն ինչպես է կապվում COP17-ի օրակարգի հետ։

«ՊԵԿ-ի ուսումնական կենտրոնի դերը հենց այդ կարողությունների զարգացումը շարունակաբար ապահովելն է: Այդ կապն առավել ակնհայտ է և առաջնային է մաքսային ծառայության դեպքում, քանի որ սահմաններով տեղափոխվող ապրանքների վերահսկողությունը շատ կարևոր նշանակություն ունի ինչպես վայրի կենդանիների, այնպես էլ բույսերի ապօրինի առևտրի, նաև վնասակար թափոնների և սահմանափակման ենթակա նյութերի ապօրինի տեղափոխման, բացահայտման և կանխարգելման գործում»,- ասաց Սյուզաննա Ղազարյանը:

Նա հավելեց, որ ուսումնական կենտրոնի դասընթացավարները մաքսային ծառայողների վերապատրաստումների շրջանակում անդրադառնում են բնապահպանական այն պահանջներին, որոնք միջազգայնորեն ամրագրված են, ինչպես նաև բոլոր այն մեթոդներին, որոնք բերում են ռիսկերի կանխարգելմանը: ՊԵԿ ուսումնական կենտրոնի կողմից առաջնահերթություն է հենց բնապահպանական գիտելիքները վերածել առօրյա աշխատանքային կիրառելի հմտությունների։

Անի Ջաբաղյանն իր հերթին նշեց, որ «կանաչ մտածելակերպի» ձևավորումը և զարգացումը տեղի են ունենում, երբ մարդը գիտակցում ու տեսնում է իր աշխատանքի ու շրջակա միջավայրի միջև եղած կապը և գիտի, թե իր ամենօրյա որոշումներում ինչ փոփոխություններ պետք է կատարի, ուստի արդյունավետ կրթությունը պետք է համադրի իրազեկման, գործնական առաջադրանքների և պատասխանատու վարքագծի ձևավորումը:

«Ուսումնական կենտրոնն իր էլեկտրոնային ուսուցման հարթակի միջոցով այս բովանդակությունը հասանելի է դարձնում նաև մարզերում և սահմանային անցման կետերում աշխատող պետական ծառայողների համար: Տեսանյութերը, ընթերցանության նյութերը, ստուգիչ հարցերը, իրավիճակային դեպքերի վերլուծությունները օգնում են ոչ միայն ստանալ տեղեկատվություն, այլև դա կիրառել ճիշտ որոշումներ կայացնելու համար»,- նշեց Ջաբաղյանը։

Մանրամասները` տեսանյութում