Ալեքսանդր Իսկանդարյանը նախագահական ընտրություններին Սերժ Սարգսյանին է ֆավորիտ համարում

ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: ՀՀ նախագահական ընտրությունների ֆավորիտը Սերժ Սարգսյանն է: Այդ մասին փետրվարի 16-ին լրագրողների հետ հանդիպմանը ասաց քաղաքագետ Ալեքսանդր Իսկանդարյանը: «Ես կարծում եմ` քչերն են կասկածում, որ Սերժ Սարգսյանը կհաղթի և կհաղթի առաջին փուլով»,-«Արմենպրես»-ի փոխանցմամբ՝ ասաց Իսկանդարյանը: Քաղաքագետը նշեց, որ դա պարզ էր դարձել խորհրդարանական ընտրություններից հետո: Նրա խոսքով` Սերժ Սարգսյանին լուրջ մրցակցություն կարող էր ցույց տալ Գագիկ Ծառուկյանը: «Դեկտեմբերից հետո, երբ պարոն Ծառուկյանը հայտնեց իր մտադրությունների մասին, ընտրությունների արդյունքը ընդհանուր առմամբ որոշված էր»,- ասաց Իսկանդարյանը: Քաղաքագետը նախագահի մյուս թեկնածուներին երկու խմբի բաժանեց՝ Րաֆֆի Հովհաննիսյանի և Հրանտ Բագրատյանի քարոզարշավը դասական բնորոշելով: «Նրանք ունեն քաղաքական կուսակցություններ, որոշակի աջակցություն, մեխանիզմներ, ֆինանսական ռեսուրսներ և փորձագետների աջակցություն»,- ասաց Իսկանդարյանը: Երկրորդ խմբում քաղաքագետը ընդգրկեց մյուս թեկնածուներին՝ որոնք չունեն նշված գործիքները:

Կառավարման փորձագետ Հարություն Մովսիսյանի դիտարկմամբ՝ Սերժ Սարգսյանի նախագահ ընտրվելու հեռանկարը երեւացել էր դեռ խորհրդարանական ընտրություններին: Փորձագետի բնորոշմամբ՝ Հրանտ Բագրատյանի առաջարկած հարյուր քայլը տարբերվում է մնացածներից, սակայն դա դեռ ծրագիր չէ: «Ծրագիրը երկու բաղադրիչ պետք է ունենա, ոչ միայն բաժակաճառեր, ցանկություններ, այլ նաև փուլային արձանագրումներ»,- ասաց Մեսրոպյանը:

Հայաստանում փետրվարի 18-ին կայանալիք նախագահական ընտրությունների քվեարկությունն անցկացնելու նպատակով 41 ընտրատարածքներում արդեն ձեւավորվել է 1988 ընտրատեղամաս: Նախընտրական քարոզչությունը կավարտվի փետրվարի 16-ին: Քվեարկությունը կսկսվի փետրվարի 18-ին` ժամը 08:00-ին եւ կավարտվի 20:00-ին: Նախագահական ընտրությունների արդյունքների ամփոփումը տեղի կունենա 2013-ի փետրվարի 25-ին: ՀՀ Նախագահի թեկնածուները յոթն են: