Հալեպում տեղի ունեցած ոճրագործության զոհերի մեջ հայի անուն չկա

ԵՐԵՎԱՆ, 4 ՓԵՏՐՎԱՐԻ, ԱՐՄԵՆՊՐԵՍ: Հալեպում օրեր առաջ տեղի ունեցած ոճրագործության զոհ դարձած շուրջ ութ տասնյակ մարդկանց մեջ հայի անուն հրապարակված չէ: Այս մասին «Արմենպրես»-ի հետ զրույցում տեղեկացրեց Բերիո թեմի ազգային առաջնորդարանի մամուլի քարտուղար Ժիրայր Ռեյիսյանն` ավելացնելով, որ շարունակվում են աշխատանքները զոհվածների անունները ճշտելու ուղղությամբ եւ, բարեբախտաբար, մինչեւ այս պահը հայի անուն նրանց թվում չի եղել:

Ռեյիսյանը նաեւ տեղեկացրեց, որ շաբաթ եւ կիրակի օրերին իրավիճակը Հալեպում համեմատաբար հանգիստ է եղել, թեպետ որոշ շրջաններում բախումները շարունակվում են, սակայն հայկական թաղամասերում հանգիստ է եղել: Փետրվարի 4-ի առավոտյան իրավիճակը նույնպես հանգիստ է, սակայն Ռեյիսյանի խոսքով, անակնկալ իրավիճակներ միշտ սպասնելի են:

Հունվարի 29-ին Հալեպի Բուսթան ալ Կասր թաղամասում հայտնաբերվել են տասնյակ դիակներ, որոնց տարիքը տատանվում է 20-30 տարեկանի միջեւ: Ընդհանուր առմամբ դիակների թիվը հասնում է ութ տասնյակի: Համացանցում տեղադրված տեսանյութի մեջ երեւում է, որ բոլոր դիակները ռազմական հագուստով են, նրանցից ոմանց ձեռքերը կապված են:

ՄԱԿ-ի տվյալներով Սիրիայում 22 ամիս շարունակվող բախումների հետեւանքով ավելի քան 60 հազար մարդ է զոհվել, այդ թվում` չորս տասնյակից ավելի հայեր: