2 րոպեի ընթերցում
ԵՐԵՎԱՆ, 30 ՀՈւՆՎԱՐԻ, ԱՐՄԵՆՊՐԵՍ: Դամասկոսում օրեր առաջառեւանգված մեր հայրենակից Նազարեթ Չարքյանն ազատ է արձակվել: Այս մասին«Արմենպրես»-ին տեղեկացրեց Դամասկոսում բնակվող մեր հայրենակից Նազարեթ Էլմաջյանն` ավելացնելով, որ Չարքյանն ազատ է արձակվել փրկագին վճարելուց հետո: Դեռ պարզ չէ, թե որքան գումար է վճարվել, միայն հայտնի է, որ փրկագինը չի եղել սկզբնական պահանջվող 500 հազար ԱՄՆ դոլարի չափով:
Ավելի վաղ հունվարի 23-ին տեղեկություններ էին ստացվել, որ դամասկոսահայ Նազարեթ Չարքյանն առեւանգվել է իր աշխատավայրից` անհայտ զինված անձանց կողմից եւ ազատ արձակելու համար պահանջվում էր 50 միլիոն սիրիական լիրա, որը համարժեք է մոտավորապես 500 հազար ԱՄՆ դոլարի:
Մայրաքաղաք Դամասկոսում իրավիճակն ընդհանուր առմամբ հանգիստ է, բախումները շարունակվում են մոտակա գյուղերում: Սիրիական ՍԱՆԱ գործակալությունը տեղեկացնում է, որ Դարիա գյուղի մոտակայքում կառավարական ուժերը զինյալներին պատկանող մեքենաներ են ոչնչացրել, որոնք օգտագործվում էին զենքեր տեղափոխելու համար: Դումա գյուղի ագարակներում տեղի ունեցած բախումների ժամանակ մեծ թվով զինյալներ են սպանվել եւ վիրավորվել, առգրավվել են նրանց զենքերը:
ՄԱԿ-ի տվյալներով Սիրիայում շուրջ 22 ամիս շարունակվող բախումների հետեւանքով ավելի քան 60 հազար մարդ է զոհվել, այդ թվում` չորս տասնյակից ավելի հայեր: Սիրիահայ մեր հայրենակիցների առեւանգման դեպքերը եւս հաճախակիացել են բախումների ընթացքում: