Հալեպում դարձյալ հայ կին է զոհվել

ԵՐԵՎԱՆ, 3 ԴԵԿՏԵՄԲԵՐԻ, ԱՐՄԵՆՊՐԵՍ: Հալեպի Թելեֆոն Հաուայե թաղամասում պատահական գնդակից զոհվել է հայ կին: Այս մասին«Արմենպրես»-ին տեղեկացրեց Բերիո թեմի ազգային առաջնորդարանի մամուլի քարտուղար Ժիրայր Ռեյիսյանն` ավելացնելով, որ զոհվածը Մարիեթ Տոշողլանյան-Պաճեքյանն է:Անդրադառնալով Հալեպում տիրող իրավիճակին` Ռեյիսյանը նշեց, որ քաղաքի կենտրոնական թաղամասերում համեմատաբար հանդարտ է, կրակոցների եւ պայթյունների ձայներ լսվում են ծայրամասերում: Նոր գյուղ հայկական թաղամասում եւս վերջին երկու օրերի ընթացքում իրավիճակն ավելի հանգիստ է, սակայն ռմբակոծությունները շարունակվում են թաղամասին մոտ գտնվող Բուսթան Բաշայում: Ռեյսիյանի խոսքով` դիպուկահարի վտանգը դեռեւս առկա է եւ ամեն վայրկյան կարելի է անակնկալներսպասել: Բախումները շարունակվում են նաեւ Հալեպի օդանավակայանի ճանապարհին:

Մամուլի քարտուղարը նաեւ ավելացրեց, որ Հալեպում էլեկտրականության ընդհատումները հաճախակի են դարձել: Արդեն հայտնի է նաեւ, որ Սիրիայում համացանցը եւ հեռախոսակապը վերականգնվել են:Ռեյիսյանը նաեւ տեղեկացրեց, որ բնակիչների ապրելակերպի դժվարությունները եւ հոգսերն ավելի ակնհայտ են դարձել, օրվա կաիրքներն ավելի դժվարությամբ են հոգում:

Սիրիայում ավելի քան 20 ամիս շարունակվող բախումների հետեւանքով մոտ 40 հազար մարդ է զոհվել, այդ թվում` 4 տասնյակից ավելի հայեր: Մոտ յոթ տասնյակ հայեր են վիրավորվել: Հայկական համայնքի մի քանի ներկայացուցիչներ առեւանգվել են. նրանցից որոշները դեռեւս գերության մեջ են: