1 րոպեի ընթերցում
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: Մոսկվայում ընդունելություն են հայտարարել կազակների ջոկատներում, որոնք կզբաղվեն փողոցների պարեկմամբ: Ինչպես «Իզվեստիա»-ին պատմել Է Մոսկվայի կազակության գործերի կոմիտեի խորհրդական Նիկոլայ Կոմարովսկին, պլանավորվում Է, որ մայրաքաղաքի յուրաքանչյուր օկրուգում կաշխատի առնվազն 50 կազակ, հաղորդում Է «Արմենպրես»-ը:
Մոտ օրերս կազակները կսկսեն պարեկել Տվերսկայա փողոցը եւ Բելոռուսկի կայարանի հրապարակը: Այս շրջանում նրանք կկասեցնեն անօրինական առեւտուրը:
Կազակները կունենան նույն լիազորությունները, ինչ որ դրուժիննիկները. այսինքն՝ նրանք չեն կարողանա ստուգել փաստաթղթերը կամ ձերբակալել իրավազանցներին: Կազակներին կհանձնեն դրուժիննիկների վկայականներ, ինչպես նաեւ կապահովեն տրանսպորտով անվճար երթեւեկությամբ: Բացի դրանից, նրանց կթույլատրեն պարեկությամբ զբաղվել իրենց համազգեստով:
Մոսկայի կազակությունն ինը հազար անդամ ունի:
Վերջին ժամանակներս կազակները նկատելիորեն ակտիվացել են: Նրանք պարբերաբար պահանջում են արգելել ներկայացումները, ձախողում են ցուցահանդեսների բացումները եւ կազմակերպում այլ ակցիաներ: