368.54
Զոհաբերության տոնի նախօրեին Սիրիայում հարյուրից ավելի մարդ է զոհվել
2 րոպեի ընթերցում
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիայում Այդ ալ Ադհա տոնին նախորդող օրն ավելի քան 100 մարդ է զոհվել: Այս մասին տեղեկացնում է «Ալ Ջազիրա»-ն` նշելով, որ զոհերի մեծամասնությունը գրանցվել է Դամասկոսի գյուղերում եւ Հալեպում: Կայքի տեղեկացմամբ` արյունալի բախումներ են տեղի ունեցել Հալեպի Միդան եւ միջազգային օդանավակայանի շրջանում, ինչպես նաեւ Իդլեբում:
Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, Սիրիայի զինված ուժերը զինյալներից մաքրել են Հալեպի Սրյան շրջանի Զուհուր փողոցում գտնվող Ֆրանս-սիրիական հիվանդանոցը եւ ազատել են զինյալների կողմից առեւանգված քաղաքացիներին եւ պաշտոնյաներին:
Աշրաֆիե թաղամասի Թանաննիր հրապարակի եւ Տարիկ բն Զիյադ այգու մոտակայքում հայտնաբերվել են զինյալների թաքստոցներ եւ լուրջ վնասներ են հասցվել նրանց:
Հալեպի մոտակայքում գտնվող Խան ալ Ասլ գյուղում կառավարական ուժերը ոչնչացրել են զինյալների պատկանող մեքենաները, ինչպես նաեւ հայտնաբերել են նրանց թաքստոցները եւ մեծ վնասներ պատճառել նրանց:
Տեղեկություններ կան, որ Հալեպի ոչխար վաճառողներն այսօր դժգոհում են, որ տոնի կապակցությանբ ոչխարներ գնող չկա: Սովորաբար տոնի ժամանակ մարդիկ մեծ թվով ոչխարներ եւ կովեր են գնում եւ զոհաբերություն անում:
Բաժանորդագրվեք մեր ալիքին Telegram-ում