2 րոպեի ընթերցում
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ: Ավարտվեցին Ֆուտբոլի աշխարհի առաջնության ընտրական փուլի հերթական հանդիպումները:«Արմենպրես»-ի փոխանցմամբ, Հայաստանի ազգային հավաքականի հետ նույն B խմբում ընդգրկված Չեխիա-Բուլղարիա զույգի խաղում դարպասի գրավում չարձանագրվեց: Իտալիան սեփական հարկի տակ 3-1 հաշվով առավելության հասավ Դանիայի նկատմամբ: B խմբի առաջատարը յոթ միավորով Իտալիան է: Բուլղարիան ունի վեց, իսկ Չեխիան` հինգ միավոր: Հայաստանի ազգային ընտրանին երեք միավորով 4-րդ տեղում է:
Մյուս խմբերում գրանցվեցին հետեւյալ արդյունքները. A խմբում խորվաթները 2-0 հաշվով հաղթեցին Ուելսին, իսկ Բելգիան` Շոտլանդիային: Մակեդոնիան նվազագույն հաշիվ պարտության մատնեց Սերբիային:
C խումբը լի էր անակնկալներով եւ գոլերով: Գերմանիայի հավաքականը չորս գնդակ ուղարկելով շվեդների դարպասը, այնուհանդերձ, չկարողացավ պահպանել հաղթական հաշիվը: Շվեդիայի ընտրանուն հաջողվեց չորս անգամ անընդմեջ գրավել Մանուել Նոյերի պաշտպանած դարպասը (4-4):
Իռլանդիային հաջողվեց 1-4 հաշվով արտագնա խաղում հաղթել Ֆարերյան կղզիների հավաքականին: Ավստրիա-Ղազախստան հանդիպումն ավարտվեց 4-0 հաշվով` հօգուտ ավստրիացիների: D խումբ. Կիրպոսը տանը չկարողացավ հաղթել Նորվեգիային (1-3), Իսլանդիան` Շվեդիային (0-2): Ալբանիա-Սլովենիա խաղն ավարտվեց 0-1 հաշվով:
F խմբի կենտրոնական խաղում Ռուսաստանի ընտրանի 1-0 հաշվով հաղթեց Ադրբեջանի հավաքականին: Իսրայելի թիմը երեք անպատասխան գնդակ ուղարկեց Լյուքսեմբուրգի դարպասը: G խմբի առաջին խաղում Լատվիան 2-0 հաշվով հաղթեց Լիխտենշտեյնին, իսկ Բոսնիա-Հերցոգովինան` Լիտվային (3-0): H խմբի անկնկալը գրանցվեց Ուկրաինա-Մոնտենեգրո խաղում, որտեղ ուկրաինացիները զիջեցին նվազագույն հաշվով: Մոլդովան հյուրընկալվելիս 0-2 հաշվով առավելության հասավ Սան-Մարինոյի նկատմամբ: Վերջին I խմբում Բելառուսը երկու անպատասխան գնդակ ուղարկեց Վրաստանի դարպասը, Իսպանիա-Ֆրանսիա խաղը ավարտվեց 1-1: