Գարեգին Բ-ն ընդունել է ՀՀ-ՌԴ տնտեսական համագործակցության միջկառավարական հանձնաժողովի համանախագահ Մաքսիմ Սոկոլովին
2 րոպեի ընթերցում
ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ: Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը հոկտեմբերի 12-ինընդունել է Ռուսաստանի Դաշնության տրանսպորտի նախարար, ՀՀ և ՌԴ տնտեսական համագործակցության միջկառավարական հանձնաժողովի համանախագահ Մաքսիմ Սոկոլովին` ուղեկցությամբ ՌԴ-ում ՀՀ արտակարգ և լիազոր դեսպան Օլեգ Եսայանի: Ինչպես «Արմենպրես»-ին տեղեկացրին Մայր Աթոռի տեղեկատվական համակարգից, հանդիպմանը ՀՀ և ՌԴ տնտեսական համագործակցության միջկառավարական հանձնաժողովի համանախագահն ուրախություն է հայտնել Ամենայն Հայոց Կաթողիկոսի հետ հանդիպման առիթով` տեղեկացնելով անցած օրերի ընթացքում հանձնաժողովի կողմից կատարված աշխատանքների մասին:
Զրույցի ընթացքում Վեհափառ Հայրապետը գոհունակություն է հայտնել երկու երկրների պատվիրակությունների արդյունավետ համագործակցության առիթով` ընդգծելով, որ այն համահունչ է երկու ժողովուրդների դարավոր բարեկամությանը և եղբայրական ոգուն: Նորին Սրբությունը ողջունել է Հայաստանի և Ռուսաստանի տնտեսական գործակցության շրջանակներում իրականացվող համատեղ ծրագրերը` հաջողություն մաղթելով միջկառավարական հանձնաժողովի հետագա աշխատանքներին:
Հանդիպմանն անդրադարձ է կատարվել երկու երկրների հոգևոր կյանքին, Հայաստանյայց Առաքելական և Ռուս Ուղղափառ Եկեղեցիների միջև առկա ջերմ փոխհարաբերություններին: Խոսվել է նաև հասարակական կյանքում հոգևոր արժեքների կարևոր դերակատարության մասին: