Հայաշատ Հալեպում իրավիճակը վերջին երկու օրերին հանգիստ է. Ժիրայր Ռեյիսյան

ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Հալեպում իրավիճակը հոկտեմբերի 8-ին եւ այսօր առավոտյան բավական հանգիստ է, մտահոգիչ դեպքեր չեն գրանցվել: Այս մասին «Արմենպրես»-ին տեղեկացրեց Հալեպի ազգային առաջնորդարանի մամլո խոսնակ Ժիրայր Ռեյիսյանն` ավելացնելով, որ ընդհանուր առմամբ, քաղաքում կայուն իրավիճակ է:Հալեպի ծայրամասերում բախումներ կան, սակայն կենտրոնական թաղամասերում, ինչպես նաեւ քրիստոնեական եւ հայկական թաղմասերում կրակոցների ձայներ չեն լսվում եւ կարծես իրավիճակը բարելավվում է:«Հուսանք, որ այսպես էլ կշարունակվի եւ իրավիճակը գնալով կլավանա»,- նշեց Ռեյիսյանը:

Նա նաեւ ավելացրեց, որ Բուսթան Բաշա թաղամասում գտնվող հայկական ծերանոցի շենքը վնասվել էր եւ, անվտանգության նկատառումներից ելնելով, այն ավելի ապահով վայր է տեղափոխվել:Անդրադառնալով հայկական դպրոցների բացվելուն, մամլո խոսնակը նշեց, որ թեպետ դպրոցները պատրաստ են ընդունել աշակերտներին, սակայն ապահովության համար դեռեւս չեն բացվել:

Մայրաքաղաք Դամասկոսում եւս իրավիճակը հանգիստ է: Բախումները մերթ ընդ մերթ շարունակվում են ծայրամասերում:

Սիրիայում ավելի քան 18 ամիս շարունակվող բախումների հետեւանքով զոհվել է 30 հազարից ավելի մարդ, այդ թվում` երեք տասնյակից ավելի սիրիահայեր: