Իտալիայի հետ խաղի ժամանակ Հայաստանի ընտրանուն կերկրպագեն նաեւ արտերկրից ժամանած հայերը

ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: Ֆուտբոլի աշխարհի առաջնության ընտրական փուլի Հայաստան-Իտալիա խաղին հայ երկրպագուները կպատրաստվեն յուրօրինակ կերպով: Այս մասին «Արմենպրես»-ի հետ զրույցում ասաց «Հայկական առաջին ճակատ» ֆան-ակումբի ղեկավար-անդամ Սերգեյ Ջանջոյանը: Քանի որ սա Մունդիալի առաջին տնային հանդիպումն է եւ այն էլ Եվրոպայի փոխչեմպիոնների հետ, ՖԱՖ-ը նախատեսել է մինչեւ խաղը կազմակերպել մեծ քայլերթ:«Իտալիայի հետ խաղը յուրահատուկ է նաեւ նրանով, որ «Հրազդան»-ը վերանորոգումից հետո կընդունի հենց աշխարհի քառակի չեմպիոններին: Նպատակ ունենք ամբողջ մարզադաշտը «ներկել» եռագույնի գույներով: Ինչպես հայաստանյան, այնպես էլ արտերկրից հայրենիք ժամանացած երկրպագուները` մոտ 700 ֆուտբոլասեր, խոստանում են աջակցել մեր ընտրանուն մինչեւ վերջին վայրկյանը»,- ասաց Ջանջոյանը:

Ինչպես տեղեկացանք Հայաստանի ֆուտբոլի ֆեդերացիայից, իտալական կողմից ֆուտբոլասերների մի ստվար զանգված ներկա կլինի հանդիպմանը, սակայն երկրպագուների հստակ քանակը դեռեւս հայտնի չէ: Երեւանում «Ֆան-զոնա»-ների ստեղծման համար Հայաստանի ֆուտբոլի ֆեդերացիան եւ Երեւանի քաղաքապետարանը դեռեւս ոչինչ չունեն նախատեսած: Ֆուտբոլի աշխարհի առաջնության ընտրական փուլի Հայաստան-Իտալիա հանդիպումը կկայանա հոկտեմբերի 12-ին` Երեւանի ժամանակով 21:00-ին, «Հրազդան» մարզադաշտում: