Հալեպի Նոր Գյուղում կառավարական ուժերը եւ ընդդիմադիրները նախապատրաստվում են լուրջ մարտերի. Ժիրայր Ռեյիսյան

ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Սիրիայի հայաշատ Նոր գյուղ շրջանում այս պահին իրավիճակը հանգիստ է եւ բախումներ չկան: Այս մասին «Արմենպրես»-ին տեղեկացրեց Հալեպի Ազգային առաջնորդարանի մամլո քարտուղար Ժիրայր Ռեյիսյանը` ավելացնելով, որ կառավարական ուժերը եւ ընդդիմադիրները նախապատրաստվում են լուրջ մարտերի: Իրավիճակը ժամ առ ժամ ավելի է լարվում:

Սիրիական ՍԱՆԱ գործակալությունն իր հերթին տեղեկացնում է, որ զինված ուժերը շարունակում են Հալեպի թաղամասերը մաքրել զինված խմբավորումներից` մեծ վնասներ հասցնելով նրանց: Տասնյակ զինյալներ են ոչնչացվել Հալեպի Բուսթան ալ Կասր, Սուաիկա թաղամասերում:

Բրիտանական The Telegraph թերթը սեպտեմբերի 13-ի մի հրապարակմամբլուր էր տարածել, թե հալեպահայերը եւ քրիստոնյաները զենք են վերցրել եւ կռվում են Սիրիայի Ազատ բանակի դեմ: Այս առիթով Ժիրայր Ռեյիսյանը նշեց, որ տարածված լուրերն իրականությանը չեն համապատասխանում: «Հայությունը դեմ է եղբայրասպան կռիվներին եւ չի մասնակցում դրանց: Մեր մտահոգությունը մեր ընտանիքների եւ հաստատությունների անվտանգությունն է: Որեւէ այլ տեղեկություն իրականությանը չի համապատասխանում»,- ասաց մամլո խոսնակը: Ավելի վաղ Ռեյիսյանը հերքել է տեղեկությունն այն մասին, որ Սիրիայի կառավարությունը կոչ է արել Նոր Գյուղի բնակիչներին լքել իրենց կացարանները:

Սիրիայում ավելի քան 18 ամիս շարունակվող բախումների հետեւանքով զոհվել է 20 հազարից ավելի մարդ, այդ թվում` երկու տասնյակից ավելի սիրիահայեր: