ՀՀ նախագահ Ռոբերտ Քոչարյանին իր հավատարմագրերն է հանձնել Հայաստանում Հունաստանի Հանրապետության նորանշանակ դեսպան Ի. Կորինթիոսը
1 րոպեի ընթերցում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: ՀՀ նախագահ Ռոբերտ Քոչարյանին այսօր իր հավատարմագրերն է հանձնել Հայաստանում Հունաստանի Հանրապետության նորանշանակ դեսպան Իոաննիս Կորինթիոսը: Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, շնորհավորելով դիվանագետին` Ռոբերտ Քոչարյանը նրան հաջողություն է մաղթել բարձր առաքելության իրականացման գործում: Գոհունակություն հայտնելով հայ-հունական քաղաքական երկխոսության մակարդակի առթիվ` նախագահն ասել է, որ երկու երկրների միջեւ հաստատված լայնածավալ հարաբերությունները դինամիկ զարգանում են: Ռոբերտ Քոչարյանը ջերմությամբ է հիշել ամիսներ առաջ Հունաստանի նախագահ Կարոլոս Պապուլիասի պետական այցը Հայաստան: Նա շնորհակալություն է հայտնել հունական կողմին` Հայաստանին ցուցաբերվող տեխնիկական աջակցության համար` հատկապես առանձնացնելով տուրիզմի, գյուղատնտեսության, պաշտպանության ոլորտները: Զրուցակիցները կարեւորել են նաեւ Հայաստան-Եվրամիություն գործողությունների ծրագրի շրջանակում Հունաստանի հետ կոնկրետ ոլորտներում համագործակցության հնարավորությունների ուսումնասիրումը: Հունաստանի նորանշանակ դեսպանը վստահեցրել է, որ ջանք չի խնայի առավել ամրապնդելու երկկողմ գործակցությունը: