Հալեպի հայկական թաղամասերի մոտակայքում ռումբեր են պայթել

ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Դամասկոսում իրավիճակը օգոստոսի 31-ի առավոտյան համեմատաբար հանգիստ է, կրակոցների ձայները լսելի չեն: Այս մասին «Արմենպրես»-ին տեղեկացրեց սիրիահայ համայնքի ներկայացուցիչ Նազարեթ Էլմաջյանը:

Հալեպում բնակվող հայերը պատմեցին, որ իրավիճակը Հալեպում, սակայն, այս գիշեր բավական լարված է եղել. 4 ռումբ է ընկել հայկական թաղամասերի մոտակայքում` ահ ու սարսափ տարածելով տեղի հայերի շրջանում: Բարեբախտաբար տուժածներ չկան: Հալեպահայերի խոսքով` ռումբերից մեկն ընկել է Վիլլաներ թաղամասի Սուրբ Աստվածածին եկեղեցու դիմաց:

Վերջին մի քանի օրերին Դամասկոսի շրջակա արվարձաններում սիրիական բանակի եւ հակակառավարական զինված խմբավորումների միջեւ բախումները սաստկացել էին:Ինչպես հաղորդում է «Արմենպրես»-ը, վկայակոչելով լիբանանյան «Ազդակ» օրաթերթը, օգոստոսի 28-ին Դամասկոսի Ջարամանա շրջանում երկու երիտասարդների թաղման արարողության ժամանակ պայթյուն է տեղի ունեցել, որի հետեւանքով տուժածների մեջ հայեր չեն եղել: Ջարամանան դրուզներով եւ արաբ քրիստոնյաներով բնակեցված թաղամաս է, որտեղ նաեւ բնակվում են շուրջ 400 հայ ընտանիքներ:

Օգոստոսի 28-ին կեսօրից հետո մայրաքաղաքի արեւելյան արվարձաններում, մասնավորապես Ջոբար արվարձանում զինված խմաբավորումները իշխանամետ բնակչության դեմ հարձակումներ են իրականացրել, որոնց հետեւանքով մի քանի տասնյակ բնակիչներ են սպանվել: Այդ տարածքի բնակիչներից էին նաեւ Մաթոսյանների ընտանիքի երեք անդամները, որոնց դիակներն արդեն դուրս են բերվել:

Օգոստոսի 29-ի առավոտյան սիրիական լրատվամիջոցները տեղեկություններ տարածեցին, որ Դամասկոսի Զամալքա արվարձանում մարտական գործողությունների պատճառով քաղաքացիներ են զոհվել, այդ թվում մեկ հայ ընտանիք: Լուրը ստուգվելուց հետո պարզ դարձավ, որ Զամալքայում հայ ընտանիք չի ապրում:

Գրեթե 18 ամիս շարունակվող բախումները Սիրիայի կառավարական ուժերի եւ ընդդիմադիրների միջեւ իրենց հարվածն են հասցրել նաեւ սիրիահայ համայնքին` պատճառ դառնալով տասնյակից ավելի զոհերի: Մեծ թվով սիրիացիներ լքում են երկիրը եւ հայտնվում են այլ երկրներում փախստականի կարգավիճակով: Վերջին շրջանում երկիրը լքում են նաեւ տեղի հայ համայնքի ներկայացուցիչները: Հայաստանում փախստականի կարգավիճակ կամ ապաստան ստանալու մասին Սիրիայիցդիմումները քննվում են արագացված ընթացակարգով` առնվազն տասն օրվա ընթացքում:Մինչ օրս Հայաստան են ժամանել շուրջ 1900 սիրիահայեր:ՀՀ միգրացիոն պետական ծառայությանը մինչ այժմ դիմել է սիրիահայ 47 ընտանիք` 91 անդամներով, որոնցից 20 ընտանիք (46 հոգի) ապահովվել է ժամանակավոր կացարանով: