The Econimist Intelligence Unit հետազոտական ընկերությունը գնահատել է Ռուսաստանից Հայաստան ուղարկվող տրանսֆերտները
1 րոպեի ընթերցում
ԵՐԵՎԱՆ, 6 ՕԳՈՍՏՈՍԻ, ԱՐՄԵՆՊՐԵՍ: Նախկին խորհրդային չորս` նավթ չարտահանող երկրներում դրամական փոխանցումներն իրենց մինչճգնաժամային ցուցանիշերին չեն վերադարձել: «Արմենպրես»-ի փոխանցմամբ` հաղորդում է The Econimist Intelligence Unit հետազոտական ընկերությունը` ամփոփելով այս տարվա առաջին 6 ամիսների ցուցանիշերը նշված երկրների համար:
Հետազոտական ընկերությունըՏաջիկստանը, Ղրղզստանը, Հայաստանը և Վրաստանը գնահատում է որպես երկրներ, որոնք լրջորեն ապավինում են այն գումարներին, որոնք տուն են ուղարկում արտերկրում (հատկապես Ռուսաստանում) աշխատող քաղաքացիները: Ռուսաստանի Կենտրոնական բանկի տվյալներով` այս չորս երկրները նախորդ տարի ընդհանուր հաշվով ստացել են վեց միլիարդ ԱՄՆ դոլար:
Վերջին տարիների արագ աճի հետևանքով 2009 թվականի անկումից հետո դրամական փոխանցումների տնտեսական ակտիվությունն աճել է: 2011 թվականին դրամական փոխանցումների ծավալները Տաջիկստանում կազմել են ՀՆԱ-ի մոտ 42.5 տոկոսը, Ղրղզստանում` 28 տոկոս, Հայաստանում 11 և Վրաստանում 7 տոկոս:
Սակայն հետազոտական ընկերությունը ներկայացրել է նաեւ որոշ մռայլ կանխատեսումներ այն մասին, որ տրանսֆերտների արագ աճն առաջիկայում բոլոր չորս երկրների համար նվազման միտումներ է սկսելու ցուցաբերել: