2 րոպեի ընթերցում
ԵՐԵՎԱՆ, 2 ՕԳՈՍՏՈՍ, ԱՐՄԵՆՊՐԵՍ: Հալեպում իրավիճակի լարվածությունը գնալով ավելի ու ավելի է խորանում: Ինչպես «Արմենպրես»-ին տեղեկացրեց սիրիահայ համայնքի ներկայացուցիչ Նազարեթ Էլմաջյանը, եթե Թուրքիան ամիսներ շարունակ փորձում էր գաղտնի կերպով գործել Սիրիայի դեմ, ապա այժմ այդ երկիրն արդեն հանդես է գալիս բացահայտորեն: Երեկվանից մուսուլմաններով բնակեցված թաղամասերում իրավիճակն ավելի է վատացել, եւ ամեն ինչ հասել է վճռական սահմանագծի:Ինչ վերաբերում է հայկական եւ քրիտստոնեական թաղամասերին, ապա ըստ Էլմաջյանի, այնտեղ ամեն ինչ հանգիստ է:
Էլմաջյանը լիահույս է, որ նախագահ Բաշար ալ Ասադը կկարողանա համառ պայքարի միջոցով հաղթել այդ ուժերին.լավատեսության նման հիմքեր սիրիահայերին տալիս են նաեւ Ռուսաստանի Դաշնության` Սիրիայի նկատմամբ ունեցած ամուր եւ հետեւողական դիրքորոշումը:
Հալեպահայերի ֆեյբուքյան էջից «Արմենպրես»-ը տեղեկացել է, որ Հալեպ քաղաքում բոլոր հեռախոսակապերը եւ ինտերնետ կապն անջատված են եւ չեն գործում: Հալեպից Երեւան ժամանած սիրիահայերը նշել են, որ օդանավակայան տանող ճանապարհը վտանգավոր է, քանի որ գրոհայինները որոշ հատվածներում հսկում են ճանապարհը: Նրանք նշել են, որ մեկ շաբաթից ավելի աշխատանքի չեն ներկայանում, մթերքների գները բավական բարձրացել են:
Սիրիահայերը նշել են նաեւ, որ Բաշար Ասադի իշխանության գլուխ մնալը նախընտրելի է եւ նպաստավոր կլինի տեղի հայ համայնքի համար:
Սիրիայում մարդու իրավունքների պաշտպանություն կազմակերպության տվյալներով` Սիրիայում ամիսներ շարունակվող բախումների հետեւանքով զոհվել է ավելի քան 18 հազար մարդ: Համաձայն արաբական լրատվամիջոցների` զոհվածների մեջ գերակշռում եմ խաղաղ քաղաքացիները: Զոհերի թվում են եղել նաեւ յոթ հայեր, որոնցից երկուսը` սիրիական բանակի զինծառայողներ: Սիրիայում տիրող իրավիճակի պատճառով մեծ թվով սիրիացիներ լքում են երկիրը: Վերջին շրջանում երկիրը լքում են նաեւ տեղի հայ համայնքի ներկայացուցիչները: Հայաստանում փախստականի կարգավիճակ կամ ապաստան ստանալու մասին Սիրիայիցդիմումները քննվում են արագացված ընթացակարգով` առնվազն տասն օրվա ընթացքում: