«Հրազդան»-ը պատրաստվում Է ընդունել իտալացի ֆուտբոլիստներին

ԵՐԵՎԱՆ, 1 ՕԳՈՍՏՈՍԻ,ԱՐՄԵՆՊՐԵՍ: Երեւանի «Հրազդան» մարզադաշտում ընթանում են շինարարական աշխատանքները: Այդ աշխատանքները նախատեսված է ավարտել հոկտեմբերի 12-ին Երեւանում կայանալիք 2014 թվականի ֆուտբոլի աշխարհի առաջնության ընտրական մրցաշարի Հայաստան-Իտալիա ֆուտբոլի ազգային հավաքականների խաղից առաջ: Շինարարական աշխատանքները մեկնարկել են 2012 թվականի փետրվարին:

Ինչպես «Արմենպրես»-ին տեղեկացրին ՀՀ ֆուտբոլի ֆեդերացիայից, «Հրազդան»-ի վերանորոգման աշխատանքները, որոնք համակարգում Է ֆեդերացիան, ընթանում են ակտիվ ռիթմով: Հայաստանի գլխավոր մարզակառույցներից մեկը` «Հրազդան» մարզադաշտը, կարող Է ընդունել նաեւ մեր հավաքականի` ֆուտբոլի աշխարհի առաջնության ընտրական մրցաշարերի այլ հանդիպումները եւս` ելնելով խաղերի հանդեպ մարզասերների հետաքրքրությունից:

«Հրազդան» մարզադաշտը ունի 50 հազարից ավելի նստատեղ, մինչդեռ Երեւանի Վազգեն Սարգսյանի անվան հանրապետական մարզադաշտը՝ 16 500:

1971 թվականին շահագործման հանձնված «Հրազդան» մարզադաշտը միջազգային լայն ճանաչում ունի եւ ֆուտբոլի միջազգային ֆեդերացիայի՝ ՖԻՖԱ-ի ներկայացուցիչները մինչ այս հանդիպումը ժամանելու են Երեւան` ծանոթանալու «Հրազդան» մարզադաշտի հնարավորություններին եւ պայմաններին: