«Ուլիս»-ը դուրս մնաց Չեմպիոնների լիգայից

ԵՐԵՎԱՆ, 24 ՀՈՒԼԻՍԻ, ԱՄԵՆՊՐԵՍ: Երևանի «Ուլիս»-ը Չեմպիոնների լիգայի երկրորդ որկավորման փուլի պատասխան խաղում ևս 0:1 հաշվով պարտություն կրեց Մոլդովայի չեմպիոն Տիրասպոլի «Շերիֆ»-ից: Ինչպես փոխանցում է «Արմենպրես»-ը, Տիրասպոլում կայացած մրցավեճում «Ուլիս»-ն ուներ տարածքային առավելություն, սակայն այդպես էլ չկարողացավ ողջ հանդիպման ընթացքում գոնե մեկ վտանգավոր հարված կատարել մրցակցի դարպասին: Ի տարբերություն մեր չեմպիոնի' Մոլդովայի չեմպիոնն ուներ 5-6 հիանալի գոլային հնարավորություն. երկու անգամ մեր թիմին վերահաս գոլերից փրկեց դարպասաձողը, իսկ մի քանի անգամ էլ հուսալի խաղով աչքի ընկավ դարպասապահ Էդվարդ Հովհաննիսյանը:

Մոլդովացիներին հաջողվեց գոլը խփել 11 մետրանոց հարվածից: Մեր թիմի տուգանային հրապարակում անզգույշ խաղով աչքի ընկավ «Ուլիս»-ի վրացի լեգեոներ Թենգիզ Ուգրեկելիձեն' կանոնները խախտելով մրցակցի ֆուտբոլիստի հետ պայքարում, ինչի արդյունքում էլ նշանակվեց 11 մետրանոց: Շերիֆ»-ի կազմում աչքի ընկավ Սամարջիչը:

Այս թիմերի առաջին խաղում ևս նվազագույն հաշվով առավելության էր հասել «Շերիֆ»-ը: