2 րոպեի ընթերցում
ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ: Եվրոպայի լիգայի խաղարկության առաջին փուլում երկու խաղերի արդյունքում Գյումրիի «Շիրակ»-ը հաղթահարեց Չեռնոգորիան ներկայացնող «Ռուդար»-ի արգելքը: Ինչպես հաղորդում է «Արմենպրես»-ը` Գյումրիում կայացած խաղում թիմերի երկրորդ հանդիպումն ավարտվեց ոչ ոքի` 1:1 հաշվով, և նախորդ խաղում մեր թիմի տարած նվազագույն հաշվով հաղթանակի շնորհիվ «Շիրակ»-ը դուրս եկավ հաջորդ փուլ: Հանդիպման սկզբում հյուրերը կարողացան բացել հաշիվը. մեր թիմի կազմում ինքնագոլի հեղինակ դարձավ թիմի առաջատար պաշտպան Հրայր Մկոյանը: Այս գոլից հետո գյումրեցիները չընկճվեցին և սկսեցին ձեռնարկել արագ գրոհներ, ինչի արդյունքում «Շիրակ»-ի լեգեոներներից Դամե Դիոպը դիպուկ հարվածով վերականգնեց հաշվի հավասարակշռությունը: Հանդիպման երկրորդ կեսն անցավ հանգիստ պայքարում: «Շիրակ»-ը կարող էր ևս երկու-երեք անգամ դառնալ գոլի հեղինակ, սակայն Լամին լի Յորոյի և Բեկոյի հարվածներից հետո իր թիմին փրկեց դարպասապահ Գորան Վուկլիշը:
Այսպիսով, Հայաստանի գավաթակիրը դուրս եկավ Եվրոպայի լիգայի խաղարկության հաջորդ փուլ, որտեղ հանդիպելու է իսրայելական «Բնեյ Յեհուդա»-ին: Թիմերի առաջին հանդիպումը տեղի կունենա հուլիսի 19-ին: