Հայաստանի ազատ ոճի ըմբիշները Ռուսաստանում հավաք կանցկացնեն

ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Հայաստանի ազատ ոճի ըմբշամարտի ազգային հավաքականը, նախապատրաստվելով ապագա միջազգային մրցումներին, հունիս-հուլիսին մի քանի ուսումնամարզական հավաք կանցկացնի Հայաստանում եւ Ռուսաստանի Դաշնության Վլադիկավկազ քաղաքում: Այս մասին «Արմենպրես»-ին տեղեկացրեց Հայաստանի ազատ ոճի ըմբշամարտի ազգային հավաքականի գլխավոր մարզիչ Արայիկ Բաղդատյանը:

Հայաստանի ազատ ոճի 3 ըմբիշ՝ 55կգ քաշային Միհրան Ջաբուրյանը, 66կգ քաշային Դավիթ Սաֆարյանը եւ 84կգ քաշային Հաջիմուրադ Նուրմագոմեդովը մասնակցելու են 2012 թվականի Լոնդոնի օլիմպիական խաղերին եւ, բացի հավաքներից, հունիսի 30-ից մինչեւ հուլիսի 2-ը կմասնակցեն Հունաստանի մայրաքաղաք Աթենքում կայանալիք ըմբշամարտի միջազգային մրցաշարի: