2 րոպեի ընթերցում
ԵՐԵՎԱՆ, 15 ՓԵՏՐՎԱՐԻ, ԱՐՄԵՆՊՐԵՍ: Գյումրիի «Շիրակ»-ը տրամադրված է հաղթել Հայաստանի գավաթի խաղարկությունում: Ինչպես հաղորդում է «Արմենպրես»-ը` «Շիրակ»-ի պաշտոնական կայքին տված հարցազրույցում թիմի կիսապաշտպան Արմեն Տիգրանյանը նշել է, որ նմանատիպ խնդիր իրենք ունեցել են նաեւ նախորդ մրցաշրջանում եւ շատ մոտ էին դրան: «Մի քանի պատճառներ կային, որ չստացվեց: Այժմ մեր առջեւ կրկին դրված է այդպիսի խնդիր եւ բացի գավաթից, առաջնությունում պետք է տեղ գրավենք առաջին եռյակում: Եվ քանի որ վերջերս պարզ դարձավ, որ Հայաստանի գավաթի եզրափակիչն անցկացվելու է Գյումրիում, ապա մենք ուղղակի պարտավոր ենք առավելության հասնել «Միկա»-ի հանդեպ կիսաեզրափակիչում, իսկ արդեն եզրափակիչում, ինչպես ասում են, տանը պատերն էլ են օգնում»,- ասել է Տիգրանյանը:
Անդրադառնալով նոր մրցաշրջանի նախապատրաստությանը` նա նշել է, որ թիմն արդեն 5 օր է գտնվում է Անթալիայում եւ ամեն ինչ ընթանում է բնականոն հունով: «Արդեն իսկ անցկացրել ենք մեկ ստուգողական հանդիպում, եւ դեռ երեք հանդիպում էլ անցկացնելու ենք: Ընդհանուր առմամբ ամեն ինչ նորմալ է: Կան, իհարկե, մի քանի բացեր, սակայն այս ուսումնամարզական հավաքի ժամանակ կփորձենք լրացնել այդ ամենը: Բոլորը շատ մարտական են տրամադրված, մարզումներին մասնակցում են մեծ եռանդով»,- ընդգծել է Տիգրանյյանը: