2 րոպեի ընթերցում
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Հայաստանի ազգային հավաքականի հարձակվող Մարկոսը «Կուբան»-ում և Ռուսաստանի պրեմիեր լիգայում կարող է նկատելի դեր խաղալ: Ինչպես հաղորդում է «Արմենպրես»-ը, այս մասին նշել է ՀՀ ազգային հավաքականի գլխավոր մարզիչ Վարդան Մինասյանը' «Կուբան»-ի պաշտոնական կայքին տված հարցազրույցում: Մինասյանն այս օրերին իսպանիայում հետևում է «Կուբան»-ի ուսումնական հավաքին:
«Մարկոսն արագ, տեխնիկապես ուժեղ ֆուտբոլիստ է, ով տիրապետում է ձախ ոտքով շատ ուժեղ հարվածի, լավ դրիբլինգ ունի: Իսկական պրոֆեսիոնալ է: Շատ լավ է զգում խաղընկերներին, այդ պատճառով նրա գլխավոր հատկանիշներից մեկն էլ գոլային փոխանցում կատարելն է: Ինչպես բոլոր բրազիլիացիները, ովքեր նախընտրում են հարձակվողական ֆուտբոլ խաղալ, առաջ նա այնքան էլ չէր օգնում պաշտպանությանը, սակայն վերջերս ուժեղացրել է նաև խաղային այդ որակը»,- ասել է Մինասյանը' լրագրողի խնդրանքով ներկայացնելով մեր ընտրանու ֆուտբոլիստին: Մինասյանի խոսքով' Մարկոսին դա հաջողվել է հատկապես հավաքականի կազմում և Դոնեցկի «Մետալուրգ»-ում ունեցած ելույթների շնորհիվ:
ՀՀ ընտրանու գլխավոր մարզչի կարծիքով' Մարկոսը շատ պատասխանատու տղա է և մարզչի առաջադրանքները փորձում է կատարել անթերի: «Բաց և կրթված անձնավորություն է, որի հետ շատ հաճելի է շփվել: Իհարկե, Ռուսաստանի առաջնությունն իր մակարդակով նկատելիորեն գերազանցում է և Հայաստանի, և նույնիսկ Ուկրաինայի առաջնություններին, սակայն ինչ-որ բան ինձ հուշում է, որ «Կուբան»-ում և ՌՊԼ-ում նա կարող է նկատելի դեր խաղալ»,- նշել է Մինասյանը: Որպես հավաքականի մարզիչ` Մինասյանը հատկապես հետաքրքրված է դրանում, այդ պատճառով «Կուբան»-ի ելույթներին կհետևի հատուկ հետաքրքրությամբ:
Մարկոսը «Կուբան» է տեղափոխվել Դոնեցկի «Մետալուրգ»-ից: Կրասնոդարյան ակումբի հետ ՀՀ ընտրանու կիսապաշտպանը կնքել է երեք տարվա պայմանագիր: