2 րոպեի ընթերցում
ԵՐԵՎԱՆ, 29 ՀՈւՆԻՍԻ, ԱՐՄԵՆՊՐԵՍ: ՀՀ վարչապետ Տիգրան Սարգսյանն այսօր ընդունել է Եվրոպայի խորհրդի տեղական ու տարածքային իշխանությունների կոնգրեսի պատվիրակությանը: Պատվիրակությունը Հայաստան է ժամանել հայկական կողմի հրավերով' Եվրախորհրդի տեղական ու տարածքային իշխանությունների կոնգրեսի Ընթացիկ հարցերի հանձնաժողովի նիստը Երեւանում անցկացնելու նպատակով:
«Ուրախ եմ, որ ձեր հերթական հանդիպման վայրը Երեւանն էր: Այն հարցերը, որ դուք քննարկել եք, արդիական են նաեւ մեզ համար: Մենք ուշադրությամբ հետեւում ենք ձեր նիստերին, տեղեկանում, թե ինչ հարցեր են քննարկվում եւ ինչպիսի մոտեցումներ կան: Մեր նպատակն է հնարավորինս զարգացնել տեղական ինքնակառավարումը Հայաստանում: Այդ տեսակետից ժողովրդավարության ամրապնդման համար տեղական ինքնակառավարման խնդիրները կարող են էական դերակատարություն ունենալ քաղաքացիական հասարակություն ձեւավորելու առումով»,- ինչպես «Արմենպրես»-ին տեղեկացրին ՀՀ կառավարության տեղեկատվության եւ հասարակայնության հետ կապերի վարչությունից, ողջունելով հյուրերին' ասել է ՀՀ վարչապետը:
Պատվիրակության անդամները շնորհակալություն են հայտնել կառավարության ղեկավարին ընդունելության համար եւ ներկայացրել իրենց երկրներում տեղական ժողովրդավարության վիճակը եւ զարգացման միտումները: Հանձնաժողովի նախագահ, ԵԽ տեղական ու տարածքային իշխանությունների Հայաստանի պատվիրակության ղեկավար Էմին Երիցյանն խոսել է հանձնաժողովի գործունեության ուղղությունների մասին, ներկայացրել հանձնաժողովի նիստի աշխատանքների ընթացքը եւ Ստրասբուրգում հոկտեմբերին կայանալիք հաջորդ նիստում ներկայացվելիք զեկույցները: Նա նշել է, որ Ստրասբուրգից դուրս արտագնա նիստերը հնարավորություն են տալիս ավելի լավ ծանոթանալ անդամ երկրներին եւ խորացնել համագործակցությունը:
Կարեւորելով տեղական ժողովրդավարության զարգացումը եւ ՏԻՄ կայացմանն ուղղված քայլերի ձեռնարկումը' կառավարության ղեկավարն ասել է, որ այս տարի նշվում է Հայաստանի ՏԻՄ 15-ամյակը, եւ այդ առթիվ ձեւավորվել է ՀՀ-ում տեղական ինքնակառավարման համակարգի ներդրման 15-ամյակի նշումը կազմակերպող հոբելյանական հանձնաժողով: