2 րոպեի ընթերցում
ԷՋՄԻԱԾԻՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոս եւ Ծայրագույն Պատրիարքն այսօր ընդունել է Իրանի Իսլամական Հանրապետության Արեւմտյան Ատրպատականի նահանգապետ Վահիդ Ջալալզադեի գլխավորած պատվիրակությանը` ուղեկցությամբ Հայաստանում ԻԻՀ-ի արտակարգ եւ լիազոր դեսպան Սեյեդ Ալի Սաղայանի եւ Արմավիրի մարզպետ Աշոտ Ղահրամանյանի: Պատվիրակությունը Հայաստան է ժամանել Արմավիրի մարզի հետ տնտեսական համագործակցության շուրջ խնդիրները քննարկելու նպատակով:
Ինչպես «Արմենպրես»-ին տեղեկացրին Մայր Աթոռի տեղեկատվական համակարգից, զրույցի ընթացքում Նորին Սրբությունն անրադարձել է Հայաստանի եւ Իրանի ջերմ ու բարեկամական հարաբերություններին՝ ուրախություն հայտնելով դրանց խորացման համար։ Վեհափառ Հայրապետը գնահատանքի ու շնորհակալական խոսք է հղել նաեւ Իրանի Իսլամական Հանրապետության իշխանություններին` իրանահայության նկատմամբ ցուցաբերած բարի վերաբերմունքի եւ աջակցության համար: Նահանգապետ Վահիդ Ջալալզադեն իր շնորհակալությունը եւ ուրախությունն է հայտնել Հայաստանում, մասնավորապես Մայր Աթոռ Սուրբ Էջմիածնում գտնվելու համար:
Նա շնորհավորել է Ամենայն Հայոց կաթողիկոսին գահակալության 11-րդ տարեդարձի կապակցությամբ` բարի նշան եւ հիշարժան համարելով տարեդարձի օրերին իր այցելությունը Մայր Աթոռ: Մեծարգո նահանգապետն իր երախտագիտությունն է հայտնել նաեւ Հայ Առաքելական եկեղեցուն` ի մասնավորի Նորին Սրբությանը` ԱՄՆ-ում Ղուրանի այրման դեպքերին քննադատական արձագանք տալու համար:
Այս կապակցությամբ Վեհափառ Հայրապետը նշել է, որ Հայ եկեղեցին անընդունելի է համարում այլոց սրբությունների նկատմամբ ցանկացած ոտնձգություն։ Հանդիպման ավարտին պատվիրակությունն այցելել է Մայր Աթոռի թանգարան: