Ն.Ս.Օ.Տ.Տ. Գարեգին Բ Ամենայն Հայոց կաթողիկոսի ձեռամբ օծվեց Վանաձորի հայորդաց տունը

ՎԱՆԱՁՈՐ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Վանաձորում այսօր կայացավ Սուրբ Գրիգոր Նարեկացու անունը կրող հայորդաց տան նորակառույց շենքի օծման հանդիսավոր արարողությունը: Վանաձորի Դիմաց թաղամասում գտնվող, ամերիկահայ բարերարներ Սարգիս եւ Ռութ Բեդեւյանների նվիրաբերած միջոցներով կառուցված գեղեցիկ շինության օծման արարողությունը կատարեց Ն.Ս.Օ.Տ.Տ. Գարեգին Բ Ամենայն Հայոց կաթողիկոսը: Մայր Աթոռ Սուրբ Էջմիածնի եւ ՀԲԸՄ-ի հայորդաց տներ գործում են Երեւանում (Նոր Նորքում, Արաբկիրում, Մալաթիայում եւ Քանաքեռում), իսկ երեքը` մարզերում (Վանաձորում, Աշտարակում եւ Էջմիածնում):

20 տարուց ավելի տնակայի պայմաններում գործող Վանաձորի հայորդաց տունն ունեցավ իր հոյակերտ մասնաշենքը, ուր արդեն իսկ հաճախում է 400 երեխա: Եռահարկ (մեկ կիսանկուղային հարկով) շինությունը կառուցվել է «Ա. Հակոբյան» ՍՊԸ-ի շինարարների ջանքերով. կազմակերպության ղեկավար Արթուր Հակոբյանն «Արմենպրես»-ին հայտնեց, որ շինարարական աշխատանքներն սկսվել էին 2006թ.-ին: Շուրջ 3500 քառակուսի մետր տարածք ընդգրկող մասնաշենքն ունի 16 դասասենյակ, երկու ընդարձակ դահլիճ, կից` սպորտային դահլիճ, դրսում` բասկետբոլի եւ թենիսի խաղադաշտեր` իրենց տրիբունաներով, առանձին կաթսայատուն, լիովին կահավորված է: Շինարարության նախահաշվային արժեքը կազմել է 583 մլն դրամ:

Բացման հանդիսավոր արարողությունից, հայորդյաց տան մուտքը եզրափակող ժապավենը կտրելուց հետո բոլորը հնարավորություն ունեցան շրջելու մասնաշենքում, ծանոթանալ երեխաների համար ստեղծված պայմաններին: Հանդիսությունների դահլիճում Ամենայն Հայոց Կաթողիկոսի նախագահությամբ կատարվեց օծման արարողությունը, որից հետո ներկաներին` վանաձորցիներին եւ հյուրերին, ուղղված խոսքով հանդես եկավ Գուգարաց թեմի առաջնորդ Սեպուհ եպիսկոպոս Չուլջյանը: Նա շնորհավորեց վանաձորցիներին. «Վաղուց էինք սպասում, այս գեղեցիկ եւ հիշարժան օրվան, թե երբ պետք է հայորդյաց նորակառույց տունն իր դռները բացի մեր զավակների առջեւ»:

Բոլոր ելույթ ունեցողներն, այդ թվում` սփյուռքի նախարար Հրանուշ Հակոբյանը, Լոռու մարզպետ Արամ Քոչարյանը, շնորհակալական խոսքեր հղեցին բարերարներին` Սարգիս եւ Ռութ Բեդեւյաններին, որոնք նաեւ Վանաձորի Սուրբ Գրիգոր Նարեկացի եկեղեցին էին «նվիրել» Լոռու մարզկենտրոնին: Ներկաները հոտնկայս ծափերով ողջունեցին տեր եւ տիկին Բեդեւյաններին, որոնք եւս շնորհավորեցին բոլորին, ինչպես նաեւ շնորհակալական խոսքեր հղեցին իրականացված աշխատանքներում իրենց վաստակն ունեցողներին, մասնավորապես` շինարարներին:

«Ինչո՞ւ չունենանք, ինչո՞ւ երեխաները թողնեն երկիրն ու գնան: Յուրաքանչյուր հայորդաց տուն կարող է հաճախել 750-1000 երեխա: Ահա, վայելեք եւ լավ պահպանեք»,- ասաց Սարգիս Բեդեւյանը: Իսկ Ամենայն Հայոց կաթողիկոսը հայորդաց տան մանկավարժներին եւ ծնողներին պատգամեց երեխաների մեջ տեսնել Աստծո պատկերը. «Ինչ անում եք երեխաների համար, անում եք Տիրոջ համար»,- ասաց նա: Հանդիսության վերջում իրենց երգով ու պարով ներկաներին ողջունեցին Վանաձորի եւ Նոր Նորքի հայորդաց տների սաները: