1 րոպեի ընթերցում
ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ: Հանրապետության օրվա առթիվ այսօր Ն.Ս.Օ.Տ.Տ. Գարեգին Բ Ամենայն Հայոց կաթողիկոսը թեմակալ առաջնորդների, Մայր Աթոռի միաբանների ուղեկցությամբ այցելել է Սարդարապատի հուշահամալիր` հարգանքի տուրք մատուցելու հանուն հայոց անկախ պետականության զոհված բազում հայորդիների անմահ հիշատակին:
Ինչպես «Արմենպրես»-ին տեղեկացրին Մայր Աթոռի մամլո դիվանից, հուշահամալիրին Ամենայն Հայոց Հայրապետը եւ Հայաստանի Հանրապետության նախագահ Սերժ Սարգսյանը ծաղկեպսակներ են դրել, ապա Նորին սրբությունը կատարել է աղոթք մայիսյան հերոսամարտերում զոհված հայորդիների հոգիների հանգստության համար: Այսօր Մայր Աթոռ Սուրբ Էջմիածնում Վեհափառ Հայրապետի հանդիսապետությամբ կատարվել է նաեւ Հանրապետական մաղթանք: