Ն.Ս.Օ.Տ.Տ. Գարեգին Բ Ամենայն Հայոց կաթողիկոսն ընդունել է Խորվաթիայի նախագահ Ստյեպան Մեսիչին
1 րոպեի ընթերցում
ԷՋՄԻԱԾԻՆ, 25 ՄԱՅԻՍԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսը մայիսի 23-ին Մայր Աթոռ Սուրբ Էջմիածնում ընդունել է Խորվաթիայի Հանրապետության նախագահ Ստյեպան Մեսիչին: Ինչպես «Արմենպրեսե-ին տեղեկացրին Մայր Աթոռի մամլո դիվանից, հանդիպման ընթացքում Վեհափառ Հայրապետը գոհունակություն է հայտնել երկու երկրների միջեւ նախագահների մակարդակով սկսված երկկողմ հարաբերությունների եւ նախանշվող համագործակցության առիթով: Զրույցի ընթացքում անդրադարձ է կատարվել երկու ժողովուրդների պատմական ընդհանրություններին, նրանց բաժին ընկած փորձություններին: Այս առումով կարեւորվել է ժողովուրդների համագործակցությունը, որպեսզի մարդկության կյանքում ապագայում երբեք չկրկնվեն անցյալի ողբերգությունները: Ամենայն Հայոց Հայրապետը մաղթել է Խորվաթիայի նախագահին, որ Բարձրյալ Տերը Խորվաթիայի բարեպաշտ ժողովրդին պարգեւի խաղաղ եւ բարօր կյանք` երկրի իշխանությունների ջանքերն արդյունավորելով բարի իրագործումներով: Հանդիպմանը խոսվել է հայկական մշակույթի, համաշխարհային քաղաքակրթության մեջ հայ ժողովրդի կարեւոր ներդրման, եվրոպական արժեհամակարգի, որի հիմքում ընկած են քրիստոնեական արժեքները, ինչպես նաեւ Հայ Առաքելական ու Հռոմեական կաթոլիկ եկեղեցիների միջեւ առկա ջերմ կապերի մասին: