2 րոպեի ընթերցում
ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ: Գարեգին Բ Ամենայն Հայոց կաթողիկոսն այսօր հովվապետական այցով մեկնել է Հնդկաստան: Ինչպես «Արմենպրեսե-ին հայտնեցին Մայր Աթոռի մամլո դիվանից, այցի ընթացքում Նորին Սրբությունը երեք օր կհյուրընկալվի Հնդիկ Մալանկարա Ուղղափառ Քույր Եկեղեցու պետ Նորին Սրբություն Բասիլիոս Մարթոմա Դիդիմոս Ա-ի կողմից (Հնդկաստանի Քերալլա նահանգ): Այնուհետեւ Վեհափառ Հայրապետը կնախագահի Կալկաթայի Ս. Նազարեթ հայկական եկեղեցու հիմնադրման 300-ամյակին նվիրված տոնակատարությունները: Հովվապետական այցի ընթացքում Հայոց Հայրապետի ձեռամբ կվերաօծվի նաեւ Մադրասի Ս. Աստվածածին հայկական եկեղեցին, Վեհափառ Հայրապետի գլխավորած պատվիրակությունը կայցելի նաեւ Տինգրայի Ս. Երրորդություն, Չինսուրահի Ս. Հովհաննես, Սեյդաբադի Ս. Աստվածածին հայկական եկեղեցիները: Կալկաթայում Հայոց Հայրապետը կայցելի նաեւ Մայր Աթոռ Սուրբ Էջմիածնի հովանու ներքո գործող Հայոց Մարդասիրական Ճեմարան: Նորին Սրբությանն ուղեկցում են Մայր Աթոռի դիվանապետ Արշակ եպիսկոպոս Խաչատրյանը, Դամասկոսի հայոց թեմի առաջնորդ Արմաշ եպիսկոպոս Նալբանդյանը, Երեւանի Գրիգոր Լուսավորիչ մայր եկեղեցու հոգեւոր տեսուչ Անուշավան եպիսկոպոս Ժամկոչյանը, Հովնան աբեղա Հակոբյանը` իբրեւ գավազանակիր, Մայր Աթոռի օտարալեզու մամուլի պատասխանատու Կտրիճ քահանա Դեւեջյանը, «Շողակաթե հեռուստաընկերության տնօրեն տիկ Մանյա Ղազարյանը եւ Մայր Աթոռի համացանցային բաժնի տնօրեն երեցկին Փոլա Դեւեջյանը: