Ն.Ս.Օ.Տ.Տ. Գարեգին Բ Ամենայն Հայոց կաթողիկոսը Մայր Աթոռ Սուրբ Էջմիածնում ընդունել է լիաբանանցի նշանավոր հասարակական գործիչ Լ. Սոլ Համադեին
3 րոպեի ընթերցում
ԷՋՄԻԱԾԻՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսը հոկտեմբերի 22-ին Մայր Աթոռ Սուրբ Էջմիածնում ընդունել է լիաբանանցի նշանավոր հասարակական գործիչ Լեյլա Սոլ Համադեին: Նշենք, որ նա Լիբանանի անկախության հիմնադիր նշանավոր այրերից մեկի` հանգուցյալ վարչապետ Ռիադ Էլ Սոլի դուստրն է եւ Լիբանանի կրթության նախկին նախարար Մաջեդ Սաբրի Համադեի այրին: Ինչպես «Արմենպրեսե-ին տեղեկացրին Մայր Աթոռի մամլո դիվանից, Ամենայն Հայոց կաթողիկոսը բարձր է գնահատել նրա բարեսիրական ավանդն ինչպես Լիբանանի ժողովրդի, այնպես էլ լիբանանահայության կյանքում: Ի դեմս Լեյլա Սոլ Համադեի` Ամենայն Հայոց կաթողիկոսն իր շնորհակալությունն ու երախտագիտությունն է հայտնել Լիբանանի ժողովրդին` ցեղասպանություն վերապրած հայ ժողովրդի զավակներին ջերմությամբ ու եղբայրական անկեղծ սիրով ընդունելու համար: Վեհափառ Հայրապետը մաղթել է, որ բոլոր ժողովուրդներն ապրեն սիրո, բարեկամության, համերաշխության ու միասնականության մեջ` օրինակ ունենալով հայ եւ լիբանանցի ժողովուրդների ջերմ հարաբերությունները: Լ. Համադեն իր երախտագիտությունն է հայտնել Վեհափառ Հայրապետին Հայաստան հրավերի համար` ընդգծելով, որ միշտ էլ ջերմ զգացումներ է տածել հայ ժողովրդի նկատմամբ: Մեծ նմանություններ տեսնելով Հայաստանի եւ Լիբանանի ժողովուրդների ճակատագրերում` տիկին Համադեն նշել է, որ հակառակ բազում դժվարությունների` Հայաստանը եւս Լիբանանի պես կարողացել է զարթոնք ապրել եւ կառուցել իր ապագան: Բարձր գնահատելով հայ ժողովրդի ավանդը Լիբանանի առաջընթացի եւ բարգավաճման գործում` Լ. Համադեն ուրախությամբ արձանագրել է, որ իր այցը Հայաստան մեծ կարեւորություն ունի առավել հարազատորեն ճանաչելու հայ ժողովրդին եւ հավաստիացրել, որ մեծ ոգեշնչումով շարունակելու է իր բարեսիրական առաքելությունը` խտրականություն չդնելով ազգային ու կրոնական հարցում: Վեհափառ Հայրապետը եւ Լեյլա Սոլ Համադեն ծաղկեպսակ են դրել երջանկահիշատակ Գարեգին Ա կաթողիկոսի շիրիմին, ապա մեկնել Ծիծեռնակաբերդ, որտեղ Ամենայն Հայոց կաթողիկոսի հանդիսապետությամբ կատարվել է հոգեհանգստյան արարողություն` ի հիշատակ Հայոց մեծ եղեռնի նահատակների: Լ. Համադեն ծաղկեպսակ է դրել Ցեղասպանության հուշահամալիրում, ծառ տնկել Եղեռնի զոհերի հիշատակի ծառուղում, եղել Ցեղասպանության թանգարանում: Դրանից հետո նա այցելել է Երեւանի Կապույտ մզկիթ: Նույն օրը Ամենայն Հայոց կաթողիկոսն ու Լ. Համադեն այցելել են նաեւ Մայր Աթոռ Սուրբ Էջմիածնի եւ ՀԲԸՄ-ի հովանու ներքո գործող Արաբկիրի Հայորդյաց տուն, ապա` Մայր Աթոռի «Ս. Ներսես Մեծե բժշկական կենտրոն եւ մանկատուն: