Ն.Ս.Օ.Տ.Տ. Գարեգին Բ Ամենայն Հայոց կաթողիկոսը եւ Քենթրբերիի արքեպիսկոպոս Ռոուան Վիլյամսն այցելել են Ծիծեռնակաբերդ
2 րոպեի ընթերցում
ԷՋՄԻԱԾԻՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսը եւ Քենթրբերիի արքեպիսկոպոս դոկտոր Ռոուան Վիլյամսը սեպտեմբերի 25- ին այցելել են Հայոց ցեղասպանության հուշահամալիր: Նրանց ուղեկցել են անգլիկան հոգեւորականներ, Եկեղեցիների համաշխարհային խորհրդի (ԵՀԽ) գլխավոր քարտուղար դոկտոր Սամուել Կոբիան, ԵՀԽ ատենապետ դոկտոր Վոլթեր Ալթմանը եւ ԵՀԽ գործադիր կոմիտեի անդամներ: Ինչպես «Արմենպրեսե-ին հայտնեցին Մայր Աթոռի մամլո դիվանից, Նորին սրբությանն ու բարձրաստիճան հյուրերին Ծիծեռնակաբերդում դիմավորել է ՀՀ ԳԱ Ցեղասպանության ինստիտուտ-թանգարանի տնօրեն Հայկ Դեմոյանը: Երկու հովվապետերն ու ԵՀԽ նախագահն իրենց ուղեկիցների հետ շրջել են Ցեղասպանության ինստիտուտ- թանգարանում, ապա ծաղկեպսակներ են զետեղել Մեծ եղեռնի զոհերի հուշահամալիրում: Այնուհետեւ Վեհափառ Հայրապետը Մայր Աթոռ Սուրբ Էջմիածնի միաբանների հետ կատարել է հոգեհանգստայան արարողություն: Ցեղասպանության զոհերի հոգիների խաղաղության համար աղոթք են բարձրացրել նաեւ Անգլիկան եկեղեցու հովվապետը եւ ԵՀԽ ատենապետ Վոլթեր Ալթմանը: Արարողությունից հետո Քենթրբերիի արքեպիսկոպոսը ծառ է տնկել Ցեղասպանության թանգարանի հարեւանությամբ: Նույն օրը երկու եկեղեցիների պետերն այցելել են Սբ Գեղարդի վանք, ծանոթացել վանքի պատմությանը: Գաղարդավանքում հոգեւոր երգերի կատարմամբ նաեւ հանդես է եկել վանքի երգչախումբը: