2 րոպեի ընթերցում
ԷՋՄԻԱԾԻՆ, 8 ՀՈԿՏԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսն իր շքախմբով հոկտեմբերի 5-ին ժամանել է Բոսթոն, ուր երեք օրերի ընթացքում մասնակցել է մի շարք միջոցառումների եւ արարողությունների: Ինչպես «Արմենպրեսե-ին հայտնեցին Մայր Աթոռի մամլո դիվանից, Վեհափառ Հայրապետը Վոթերթաունի Սուրբ Հակոբ եկեղեցում հանդիպել է մանուկների հետ: Կիրակի օրը Քեմբրիջի Սուրբ Երրորդություն եկեղեցում մատուցվել է Հայրապետական Սուրբ պատարագ: Նորին սրբությունն այցելել է նաեւ Քենեդու գրադարան, եղել Ամերիկայի թանգարանում: Այս օրերին Ամենայն Հայոց կաթողիկոսը կկատարի նաեւ Բոսթոնից հյուսիս գտնվող Հայ Փոյնթեում կառուցվող հայկական եկեղեցու հիմնարկեքի արարողությունը, կայցելի Հոլոքոսթի հուշահամալիր: Ուրբաթ օրը` երեկոյան, Նորին սրբությունը հանդիպում է ունեցել 18-45 տարեկան բոստոնաբնակ երեք հարյուր հայորդիների հետ: Նա կարեւորել է հայոց քրիստոնեական հավատի առկայությունը հայորդիների կյանքում` հորդորելով նրանց հավատարիմ լինել իրենց հավատին: «Կիրակի, երբ ձեզ հետ միասին մասնակցում ենք Սուրբ պատարագի, մենք վկայում էինք քրիստոնեական մեր հավատն ու ժառանգությունը, որ 1700 տարի շարունակ մեզ են փոխանցել մեր հայրերը եւ մայրերը: Մոտեցեք Աստծուն, սիրեցեք ձեր եկեղեցին, եղեք հավատավոր ամերիկացիներ եւ երբեք մի մոռացեք ձեր հայ քրիստոնեական ինքնությունը` այն բելերով ձեր հարկերից ներս` իբրեւ անբաժանելի մաս ձեր ամենօրյա կյանքիե, - ասել է Հայոց Հայրապետը: Երեսունօրյա հովվապետական այցի ընթացքում Ամենայն Հայոց կաթողիկոսն այցելելու է ԱՄՆ 13 նահանգների 18 քաղաքներ: