Ն.Ս.Օ.Տ.Տ. Գարեգին Բ Ամենայն Հայոց կաթողիկոսը մեկնեց Խարկով

ԷՋՄԻԱԾԻՆ, 23 ՕԳՈՍՏՈՍԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսն այսօր հովվապետական այցով մեկնեց Ուկրաինայի հայոց թեմ, ուր Խարկով քաղաքում օգոստոսի 24-ին Վեհափառ Հայրապետը կկատարի նորակառույց Ս. Հարություն եկեղեցու օծումը: Ս. Հարություն եկեղեցու օծման արարողությունը ներառված է Խարկովի հիմնադրման 350-ամյակի տոնակատարությունների շրջանակում: Ինչպես հայտնեցին Մայր աթոռի մամլո դիվանից, եկեղեցու հիմքերը դրվել են դեռեւս 2000թ. հուլիսի 1- ին: Այն Արեւելյան Ուկրաինայի առաջին հայկական եկեղեցին է: Նախատեսվում է եկեղեցական համալիրն ամբողջացնել նաև կիրակնօրյա դպրոցով և այլ շինություններով, որոնք կծառայեն հայ համայնքի հոգեւոր-մշակութային կյանքի արդյունավետ կազմակերպմանը: Այցի ընթացքում Նորին Սրբությունը հանդիպումներ կունենա Խարկովի շրջանի մարզպետի, Խարկովի քաղաքապետի, Խարկովի Նիկոդիմ միտրոպոլիտի և այլ պաշտոնատար անձանց հետ: Վեհափառին ուղեկցում են Ներսես արք. Պոզապալյանը և Տիրան աբղ. Պետրոսյանը` որպես գավազանակիր: