Գարեգին Բ Ամենայն Հայոց կաթողիկոսն ընդունել է Ռոստովի նահանգապետի գլխավորած պատվիրակությանը
2 րոպեի ընթերցում
ԷՋՄԻԱԾԻՆ, 11 ՓԵՏՐՎԱՐԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսն այսօր ընդունել է Ռուսաստանի Դաշնության Ռոստովի մարզի նահանգապետ Վլադիմիր Չուբի գլխավորած պատվիրակությանը։ Հանդիպմանը ներկա է եղել Ռուսաստանի եւ Նոր Նախիջեւանի թեմի առաջնորդ Տ. Եզրաս եպս. Ներսիսյանը։ Ինչպես հայտնեցին Մայր Աթոռի մամլո դիվանից, ողջունելով հյուրերին՝ Նորին Սրբությունն ուրախություն է հայտնել հայ-ռուսական եղբայրական ջերմ հարաբերությունների համար եւ գոհունակությամբ նշել ռուսաստանաբնակ հայերի նկատմամբ իշխանությունների հոգատար վերաբերմունքը։ Այս առիթով Վեհափառ հայրապետն իր մասնավոր երախտիքն է հայտնել նահանգապետին՝ Ռոստովի հայոց Ս. Խաչ եկեղեցին հայ համայնքին վերադարձնելու առնչությամբ: Մատնանշելով եկեղեցի- պետություն բարի հարաբերությունները՝ կաթողիկոսը ողջունել է ռուս հոգեւորականի՝ Ռոստովի եւ Նովոչերկասկի արքեպիսկոպոս Պանտելեիմոնի ներկայությունը պատվիրակության կազմում։ Նահանգապետ Վլ.Չուբը, շնորհակալություն հայտնելով ընդունելության համար, կարեւորել է ռուսահայ համայնքի ներդրումը նահանգի զարգացման գործին՝ նշելով, որ այս տարի տոնախմբվելու է հայերի Ռոստովում հաստատման 225-ամյակը։ Հանդիպման ընթացքում Վեհափառ հայրապետը հյուրերին հայտնել է նաեւ իր ցավակցությունը՝ վերջերս Մոսկվայի մետրոյում կատարված ահաբեկության առիթով։