2 րոպեի ընթերցում
ԷՋՄԻԱԾԻՆ, 26 ՓԵՏՐՎԱՐԻ, ԱՐՄԵՆՊՐԵՍ: Մայր Աթոռ Սբ Էջմիածնում այսօր Ն.Ս.Օ.Տ.Տ. Գարեգին Բ Ամենայն Հայոց կաթողիկոսն ընդունել է Իրանի Իսլամական Հանրապետության տեղեկատվության նախարար Ալի Յունեսիին եւ նրա գլխավորած պատվիրակությանը: Ինչպես հայտնեցին Մայր Աթոռի մամլո դիվանից, հանդիպման ընթացքում խոսվել է երկու հարեւան երկրների պատմական ու մշակութային կապերի, երկու ժողովուրդների բարեկամության մասին։ Վեհափառ հայրապետն ուրախությամբ նշել է հայ-իրանական բարեկամական հարաբերությունների տեսանելի առաջընթացը եւ իր երախտագիտությունն է հայտնել Իրանի իշխանություններին այն հոգատար վերաբերմունքի համար, որ ցուաբերում են հայ համայնքին։ Մասնավորապես նշվել է, որ իրանահայերը, լինելով երկրի լիիրավ քաղաքացիներ, ազատորեն կարողանում են պահպանել իրենց ազգային-կրոնական ավանդույթները։ Կաթողիկոսն ու իրանցի նախարարը ժողովուրդների բարեկամության ամրապնդման կարեւոր ազդակ են նկատել կրոնների միջեւ երկխոսությունը։ Այս առիթով Ալի Յունեսին նշել է, որ Վեհափառ հայրապետն իր ներկայությամբ կարեւոր ներդրում կարող է ունենալ արդեն մի քանի տարի առաջ Իրանում սկիզբ առած նմանատիպ երկխոսությանը։ Հանդիպման ավարտին Ալի Յունեսին շնորհակալություն է հայտնել ընդունելության համար` նշելով, որ մեծապես տպավորված է հնամենի Սբ Էջմիածնով։ Հյուրերն այցելել են նաեւ Մայր Աթոռի թանգարան։ Պատվիրակությանը Մայր Աթոռ Սբ Էջմիածին ուղեկցել են երկու երկրների արտակարգ եւ լիազոր դեսպաններն ու ՀՀ ազգային անվտանգության ծառայության տնօրեն Կառլոս Պետրոսյանը։