Գարեգին Բ Ամենայն Հայոց կաթողիկոսն ընդունել Է Հայաստանում Լեհաստանի Հանրապետության դեսպան Վիկտոր Ռոսսին
2 րոպեի ընթերցում
ԷՋՄԻԱԾԻՆ, 4 ՓԵՏՐՎԱՐԻ. ԱՐՄԵՆՊՐԵՍ: Մայր Աթոռ Սբ. Էջմիածնում Ն.Ս.Օ.Տ.Տ. Գարեգին Բ Ամենայն Հայոց կաթողիկոսն այսօր ընդունեց Հայաստանում Լեհաստանի Հանրապետության նորանշանակ դեսպան Վիկտոր Ռոսսին։ Ինչպես հայտնեցին Մայր Աթոռի մամալո դիվանից, զրույցի ընթացքում Նորին Սրբությունն ու պրն. Ռոսսն անդրադարձել են հայ-լեհական պատմական կապերին։ Պրն. դեսպանը մասնավորապես նշել Է այն մեծ ներդրումը, որ 14-րդ դարից ի վեր ունեցել է լեհահայ համայնքն իր երկրի մշակույթի զարգացման գործում։ Վեհափառ Հայրապետն իր հերթին ուրախություն Է հայտնել Հայաստանում Լեհաստանի դեսպանատան հաստատման առնչությամբ եւ վստահություն, որ երկու երկրների միջեւ ամրապնդվող դիվանագիտական հարաբերությունները նպաստելու են երկու երկրների եւ ժողովուրդների բարեկամության զորացմանը։ Հանդիպման ընթացքում խոսվել Է նաեւ վերջին տարիներին բազմաթիվ հայերի Լեհաստան ներգաղթի, ինչպես նաեւ նրանց հոգեւոր կյանքի կազմակերպմանն առնչվող խնդիրների շուրջ։ Այս առիթով Վեհափառ Հայրապետը գոհունակությամբ նշել Է, որ Վարշավայի համալսարանում աստվածաբանություն է ուսանում Մայր Աթոռ Սբ. Էջմիածնի միաբան Տ. Դանիել աբեղա Թումանյանը։ Հանդիպման ավարտին Վեհափառ Հայրապետն արգասաբեր աշխատանք Է մաղթել նորանշանակ դեսպանին՝ ի շահ երկու երկրների եւ ժողովուրդների բարօրության։