1 րոպեի ընթերցում
ԷՋՄԻԱԾԻՆ, 14 ԱՊՐԻԼԻ, ԱՐՄԵՆՊՐԵՍ: Ապրիլի 13-ին Մայր Աթոռ Ս. Էջմիածնում հանդիսավորապես նշվեց Ծաղկազարդը՝ հիշատակը Հիսուս Քրիստոսի Երուսաղեմ մուտք գործելու: Այս առթիվ Մայրավանքում Ս. Պատարագ մատուցվեց, պատարագիչն էր Գերաշնորհ Տ. Հուսիկ արք. Սանթուրյանը: Ինչպես հայտնեցին Մայր Աթոռի մամլո դիվանից, նախքան սրբազան արարողությունը, հանդիսապետությամբ Գարեգին Բ Ամենայն հայոց կաթողիկոսի, զանգակատան դիմաց կատարվել է Անդաստան, որի ընթացքում օրհնվել են աշխարհի չորս կողմերն ու արմավենու և ուռենու ճյուղերը: Հավարտ Ս. Պատարագի Վեհափառ Հայրապետն օրհնել է ներկա բոլոր մանուկներին՝ իր հայրական պատգամը փոխանցելով նրանց: «Այս երեխաները պիտի կրթվեն Աստծո պատգամներով ու պատվիրաններով, որպեսզի ճանաչեն բարին մեր կյանքում և կարողանան իրենց ընթացքը պահել բարու ճանապարհների վրա: Աղոթքով հայցում ենք Երկնավոր մեր Տիրոջից, որ իր ամենախնամ հայացքի ներքո աճ և հասակ պարգևի սիրասուն մեր զավակներին, որպեսզի նրանք լինեն հավատավոր, նախանձախնդիր անձեր մեր հայրերի սուրբ հավատքի, ինչպես նաև արժանավոր քաղաքացիներ մեր ազատ ու անկախ հայրենի երկրիե, -պատգամել է Նորին Սրբությունը: