Գարեգին Բ Կաթողիկոսն ընդունեց Լիտվայի

պաշտպանության նախարարին ԷՋՄԻԱԾԻՆ, 23 ԱՊՐԻԼԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն հայոց կաթողիկոսն այսօր ընդունել է Լիտվայի Հանրապետության պաշտպանության նախարար Լինաս Լինկեւիչուսի գլխավորած պատվիրակությանը՝ ՀՀ պաշտպանության փոխնախարար Միքայել Գրիգորյանի ուղեկցությամբ։ ԻՆչպես տեղեկացրին Մայր Աթոռի մամլո դիվանից, Վեհափառ Հայրապետը, ուրախություն հայտնելով հայ-լիտվական զարգացող հարաբերությունների առնչությամբ, վստահություն է հայտնել, որ պետական մակարդակով փոխայցելությունները կամրապնդեն ու առավել արդյունավետ կդարձնեն նաեւ երկու ժողովուրդների բարեկամությունը։ Հանդիպման ընթացքում խոսվել է զինված ուժերում հոգեւոր ծառայության կարեւորության մասին եւ այս ասպարեզում փոխհամագործակցության հնարավորության շուրջ։ Վեհափառ հայրապետն ուրախությամբ փաստել է, որ այսօր Հայոց բանակում հոգեւոր ծառայություն են իրականացնում շուրջ 30 հոգեւորականներ՝ նպաստելով քրիստոնեական-բարոյական սկզբունքների ամրապնդմանը զինծառայողների շրջանում։ Հանդիպմանը ներկա են եղել Մայր Աթոռ Սբ. Էջմիածնի դիվանապետ Տ. Արշակ աբեղա Խաչատրյանը եւ ՀՀ զինված ուժերում Հոգեւոր ծառայության առաջնորդ Տ. Արշեն աբեղա Սանոսյանը։