2 րոպեի ընթերցում
ԵՐԵՎԱՆ, 30 ԱՊՐԻԼԻ, ԱՐՄԵՆՊՐԵՍ (թղթ. Արփինե Անդրեասյան): Այսօր ՀՀ գիտությունների ազգային ակադեմիայում կայացած տարեկան ընդհանուր ժողովի ժամանակ ակադեմիայի նախագահ üադեյ Սարգսյանն ընդհանուր ժողովի միաձայն որոշման համաձայն Ամենայն Հայոց Գարեգին Բ կաթողիկոսին հանձնեց ՀՀ ԳԱԱ պատվավոր ակադեմիկոսի դիպլոմը: «Մեր ժողովուրդը իրավացիորեն հպարտ է իր բազում զավակներով, ովքեր ծանրակշիռ ներդրում ունեն գիտության տարբեր բնագավառներում եւ իրենց բեղմնավոր գործունեությամբ գիտական աշխարհում հանրահայտ են դարձրել գիտության մեր կաճառը` ազգային ակադեմիանե,-ասաց կաթողիկոսը: Նա իր ուրախությունը հայտնեց գիտության առաջընթացի դեպի հայրենի տնտեսության եւ արտադրության զարգացման, դեպի արվեստի, պատմական, իրավագիտական, գրականագիտական եւ այլ ոլորտների ուղղորդմամբ: Վեհափառի խոսքերով, հավատի եւ գիտության նպատակը նույնն է` ճանաչողությունը: «Գիտության եւ հավատի միջեւ հակասություն չէ, որ պետք է փնտրել, այլ փոխլրացում` ներքին ամուր կապ, երբ հավատը լուսավորում է գիտության ուղին եւ գիտությունը վկայում է հավատի իսկությունը: Դրանք միմյանցից անբաժան ծնունդ են տվել հարուստ ժառանգության, որը բոլոր ժամանակներում ճանաչվելու է իբրեւ հայ մտքի ու մշակույթի բարձր նվաճումե,-ասաց նա: Ամենայն Հայոց կաթողիկոսն ավելացրեց, որ հայրենի գիտության մի շարք ճյուղեր սկիզբ են առել ու ծաղկել վանքերի կամարների ներքո եւ իմացության սերը միշտ արթուն է մնացել հայության հոգում եւ դարձել այն զենքը, որով ամենադժնդակ ժամանակներում հայ ժողովուրդը պահպանել է ինքնությունը: Վեհափառն իր ելույթը եզրափակեց տերունական աղոթքով: