Ավագ Հինգշաբթի Գարեգին Բ Կաթողիկոսը կատարեց Ոտնլվայի կարգը

ԷՋՄԻԱԾԻՆ, 17 ԱՊՐԻԼԻ. ԱՐՄԵՆՊՐԵՍ: Ապրիլի 17-ին՝ Ավագ Հինգշաբթի, Մայր Աթոռ Սբ. Էջմիածնում սկսվեցին Ավագ Շաբաթվա գլխավոր արարողությունները, որոնք խորհրդանշում են Հիսուս Քրիստոսի վերջին ընթրիքը, Փրկչի կողմից իր աշակերտների ոտքերի լվացումը եւ Ս. Հաղորդության խորհրդի հաստատումը։ Ինչպես հայտնեցին Մայր Աթոռի մամլո դիվանից, առավոտյան Մայր Տաճարում, ի հիշատակ Հիսուս Քրիստոսի վերջին ընթրիքի եւ Հաղորդության խորհրդի հաստատման, մատուցվել է Սբ. Պատարագ։ Սրբազան արարողության ընթացքում հաղորդություն են ստացել բազմաթիվ հավատացյալներ։ Պատարագիչն էր Տ. Կորյուն աբեղա Առաքելյանը։ Հետմիջօրեին ձեռամբ Ն.Ս.0.Տ©Տ© Ամենայն Հայոց Գարեգին Բ Կաթողիկոսի կատարվել է Ոտնլվայի արարողությունը։ Սուրբգրային ընթերցումներից հետո Վեհափառ Հայրապետը խաչով ու Ավետարանով օրհնել է ջուրը եւ յուղը։ Ապա, Հիսուս Քրիստոսի օրինակով, ծնկաչոք լվացել եւ յուղով օծել է 12 հոգու ոտքերը։ Արարողությունից հետո հավատացյալներին բաժանվել է օրհնված յուղ։ Ավանդության համաձայն, հավատացյալներն այն գործածում են հիվանդությունների ժամանակ կամ խառնում են տանն ունեցած յուղին։ Ավագ Հինգշաբթի, Խավարման գիշերը, ժամը 20։00-ից մինչեւ ուշ գիշեր կատարվում է նաեւ Հիսուս Քրիստոսի չարչարանաց եւ խաչելության կարգը։