2 րոպեի ընթերցում
ԷՋՄԻԱԾԻՆ, 12 ՄԱՐՏԻ. ԱՐՄԵՆՊՐԵՍ: Եկեղեցիների Համաշխարհային Խորհրդի Հայաստանյան Կլոր սեղանի հրավերով մարտի 10-ին Մայր Աթոռ Սբ. Էջմիածնում տեղի ունեցավ գործընկեր հասարակական կազմակերպությունների ներկայացուցիչների համատեղ ժողով։ Ըստ Մայր Աթոռի մամլո դիվանի տեղեկատվության, Հայաստանյայց Առաքելական Եկեղեցու նախաձեռնությամբ ստեղծված Կլոր սեղանը արդեն 6 տարի համագործակցում է հայաստանյան թեմերի, ինչպես նաեւ հասարակական ավելի քան 20 կազմակերպությունների հետ։ Կլոր Սեղանի դրամաշնորհներով բոլոր այս կազմակերպություններն իրականացնում են սոցիալական, կրթական եւ գյուղատնտեսական ծրագրեր՝ նպաստելով երկրի զարգացմանը։ Ժողովի ընթացքում ԵՀԽ ԿՍ գրասենյակի տնօրեն Կարեն Նազարյանը ներկայացրել է Կլոր սեղանի կատարած աշխատանքները եւ առաջիկայում իրականացվելիք ծրագրերը, ապա անդրադարձել է այն արդյունավետ փոխհամագործակցությանը, որ իրականացվում է Հայաստանյայց Եկեղեցու, Կլոր սեղանի, Հայաստանի եւ արտերկրի այլ հասարակական կազմակերպությունների միջեւ: ՀԿ-ների ներկայացուցիչները միմյանց ներկայացրել են գործունեության իրենց ծրագրերը եւ քննել համագործակցության հետագա հեռանկարներն ու ակնկալիքները։ Ժողովականներին հանդիպել եւ իր օրհնությունն է տվել Ն.Ս.Օ.Տ.Տ. Գարեգին Բ Ամենայն հայոց կաթողիկոսը։ Շնորհավորելով արձանագրված հաջողությունների համար՝ Վեհափառ հայրապետը բարձր է գնահատել ԵՀԽ ԿՍ աշխատակիցների գործունեությունը, նվիրումն ու նախանձախնդիր ծառայությունը: Հայոց Հայրապետն անդրադարձել է նաեւ հասարակական կազմակերպությունների առաքելությանը՝ ասելով. «Բարեգործություն կատարելով՝ մեր ժողովրդի հոգում բարեգործության ոգի եք սերմանումե: Հանդիպման ավարտին Նորին Սրբությունը ներկայացրել է Հայաստանյայց Առաքելական Սբ. Եկեղեցու գործունեությունը կրթական, մշակութային եւ սոցիալական ոլորտներում, ապա պատասխանել ներկաների հարցերին: