2 րոպեի ընթերցում
ԷՋՄԻԱԾԻՆ, 16 ՀՈԿՏԵՄԲԵՐԻ. ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն հայոց կաթողիկոսն այսօր ընդունեց Հայաստանում Արաբական Միացյալ Էմիրությունների արտակարգ եւ լիազոր դեսպան Խալիýա Շահին Ալ Մրրիին (նստավայրը՝ Թեհրան), որին ուղեկցում էր Իրանում Հայաստանի արտակարգ եւ լիազոր դեսպան Գեղամ Ղարիբջանյանը։ Ինչպես հայտնեցին Մայր Աթոռի մամլո դիվանից, Վեհափառ Հայրապետը ուրախություն է հայտնել երկու երկրների միջեւ դիվանագիտական հարաբերությունների հաստատման առնչությամբ՝ վստահությամբ նշելով, որ դրանք պետք է ծառայեն հայ-արաբական բարեկամության ամրապնդմանն ու երկրների զորացմանը։ Շնորհակալություն հայտնելով ընդունելության համար, դեսպանը շնորհավորել է Վեհափառ Հայրապետին Սբ Էջմիածնի Մայր Տաճարի օծման 1700-ամյակի առիթով։ Խալիýա Շահին Ալ Մրրիին նշել է նաեւ, որ իր երկրում մեծագույն ակնածանքով են վերաբերվում հայ ժողովրդին։ Հանդիպման ընթացքում խոսվել է կրոնների միջեւ երկխոսության կարեւորության մասին։ «Անչափ ուրախ ենք, որ այսօր առկա է փոխհասկացողություն եւ նաեւ՝ փոխգործակցություն քրիստոնյա եւ իսլամ կրոնների միջեւ։ Որովհետեւ ներկայիս անհանգիստ աշխարհը միահամուռ ջանքերով միայն կարող ենք փրկել ավերումից ու զանազան վտանգներից։ Այդ առումով կարեւոր դեր ունեն կրոններն ու նրանց սպասավորներըե,- ասել է Վեհափառ Հայրապետը՝ նկատելով, որ ասվածի լավագույն ապացույց է այն, որ արաբական աշխարհում բազմաթիվ հայորդիք ապրում են խաղաղ ու ապահով կյանքով։