Ձեռամբ Գարեգին Բ Ամենայն հայոց կաթողիկոսի օրհնվեցին Մայր Աթոռ Ս. Էջմիածնի միաբանական նոր շենքի հիմքերը
1 րոպեի ընթերցում
ԷՋՄԻԱԾԻՆ, 2 ՍԵՊՏԵՄԲԵՐԻ. ԱՐՄԵՆՊՐԵՍ: Ձեռամբ Գարեգին Բ Ամենայն հայոց կաթողիկոսի, շաբաթ օրը օրհնվեցին Մայր Աթոռ Ս. Էջմիածնում կառուցվող միաբանական նոր շենքի հիմքերը: Ինչպես հայտնեցին Մայր Աթոռի մամլո դիվանից, այս ձեռնարկն իրականացվում է ազգային մեծ բարերար Ալեք Մանուկյանի որդու՝ Ռիչարդ Մանուկյանի հովանավորությամբ եւ Մայր Աթոռի գլխավոր ճարտարապետ Ռուբեն Ազատյանի նախագծով: Երկհարկանի շենքն ունենալու է 50 սենյակ: Միաբանական կացարանի շինարարությունը նախատեսվում է ավարտել 2004թ.: Հիմքերի օրհնությունից հետո Վեհափառ հայրապետն իր օրհնության խոսքն է ուղղել բարերարներին եւ ներկաներին: «Մեր աղոթքն է, որ Տերը զորացնի մեր Եկեղեցին եւ ուժ, կորով պարգեւի մեզ՝ եկեղեցականներիս, մեր առաքելությունն ամբողջանվեր իրականացնելու եւ արդարացնելու այն բոլոր հույսերն ու ակնկալիքները, որ ունի ժողովուրդը մեր հանդեպե,- ասաց Նորին Սրբությունը: Հիմնօրհնեքի արարողությանը ներկա էին Մայր Աթոռի միաբաններ, բարերարի քույրը՝ Լուիզ Սիմոն Մանուկյանը դստեր հետ, հյուրեր սփյուռքից, Մայր Աթոռի աշխատակազմի անդամներ եւ հավատացյալներ: